გიორგი სოსიაშვილი გაეროს გენერალური ასამბლეის სესიაზე პრემიერ-მინისტრის მონაწილოებაზე: მნიშვნელოვანი სამიტია და კიდევ ერთხელ დასტურდება ჩვენი ქვეყნის დიდი როლი და მნიშვნელობა მსოფლიო უსაფრთხოებაში

პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილემ, გიორგი სოსიაშვილმა საქართველოს პრემიერ-მინისტრი ირაკლი კობახიძის გაეროს გენერალური ასამბლეის 81-ე სესიაში მონაწილეობა „დღის ქრონიკაში“ შეაფასა.

სოსიაშვილი აღნიშნავს, რომ ასეთ მნიშვნელოვან სამიტზე მონაწილეობა ადასტურებს, თუ რა დიდი როლი და მნიშვნელობა აქვს საქართველოს მსოფლიო უსაფრთხოებაში.

„მნიშვნელოვანი სამიტია, რომელსაც ბატონი პრემიერ-მინისტრი ესწრება და ამ მხრივ კიდევ ერთხელ დასტურდება ჩვენი ქვეყნის დიდი როლი და მნიშვნელობა მსოფლიო უსაფრთხოებაში, მშვიდობის ერთიანი კონცეფციის ჩამოყალიბებაში, ახალი დღის წესრიგის შექმნაში, რომელიც კონფლიქტებისა და ომის კერების მშვიდობიანი გზებით დარეგულირებას ნიშნავს.

ჩვენთვის ძალიან მნიშვნელოვანია ამ პროცესებში ჩართულობა, ვინაიდან ვფიქრობ, რომ ყველაზე მეტად ამ რეგიონში ჩვენ ვიწვნიეთ ომის უბედურება და ომის საშინელება. ტერიტორიული მთლიანობის აღდგენის ერთადერთი გზა გვესახება მშვიდობიანი პოლიტიკა, შერიგების პოლიტიკა და ეს გზავნილები გააჟღერა ბატონმა პრემიერ-მინისტრმა ამ სამიტზე.

საქართველოს გეოპოლიტიკური მდებარეობა, სწორედ ეს არის მსოფლიოსთვის, რომ ჩვენი ჩართულობით ძალიან სასიკეთო ძვრები უნდა განხორციელდეს არა მხოლოდ რეგიონის მშვიდობიანი დასტაბილურების თვალსაზრისით, არამედ მთელი მსოფლიოს მასშტაბითაც, ვინაიდან ერთმანეთზე ბევრი პროცესია გადაჯაჭვული“, - აღნიშნა გიორგი სოსიაშვილმა.

საქართველოს პრემიერ-მინისტრი ირაკლი კობახიძე გაეროს გენერალური ასამბლეის 81-ე სესიაში მიიღებს მონაწილეობას. გენერალური ასამბლეის სესიის გენერალურ დებატებზე საქართველოს მთავრობის მეთაური სიტყვით 24 სექტემბერს გამოვა.