გიორგი სოსიაშვილი: ვერავინ მიგვითითებს ჩვენ იმაზე, რომელი კანონი უნდა შევიტანოთ პარლამენტში, რომელი კანონი უნდა განვიხილოთ, ან რომელი კანონი უნდა გავიწვიოთ, გავაუქმოთ, ან ცვლილება შევიტანოთ

განათლების, მეცნიერებისა და ახალგაზრდულ საქმეთა საპარლამენტო კომიტეტის თავმჯდომარის მოადგილის, საპარლამენტო უმრავლესობის წევრის გიორგი სოსიაშვილის განცხადებით, ვერავინ მიუთითებს საქართველოს ხელისუფლებას იმაზე, თუ რომელი კანონი უნდა შეიტანოს პარლამენტში, რომელი კანონი უნდა განიხილოს, ან რომელი კანონი უნდა გაიწვიოს, გააუქმოს, ან ცვლილება შეიტანოს.

ასე გამოეხმაურა სოსიაშვილი ევროპის საბჭოს მინისტრთა კომიტეტის გადაწყვეტილებას, რომელიც საქართველოს ხელისუფლებას კანონმდებლობის გადახედვისკენ მოუწოდებს. გადაწყვეტილება გამოქვეყნდა, საქმეზე „მაქარაშვილი და სხვები საქართველოს წინააღმდეგ“ ევროპული სასამართლოს გადაწყვეტილების აღსრულების მონიტორინგის ფარგლებში.

„ვერავინ მიგვითითებს ჩვენ იმაზე, რომელი კანონი უნდა შევიტანოთ პარლამენტში, რომელი უნდა განვიხილოთ, ან რომელი უნდა გავიწვიოთ, გავაუქმოთ, ან ცვლილება შევიტანოთ. ეს არის ქართველი ხალხის ნებით არჩეული საქართველოს ეროვნული ხელისუფლების, საკანონმდებლო ორგანოს გადასაწყვეტი. ბუნებრივია, მე ვურჩევდი, რომ თავად მათ გადახედონ თავიანთ კანონებს, იმიტომ რომ ზოგიერთი ქვეყნის კანონმდებლობა აბსურდამდე მივიდა. მხედველობაში მაქვს არატრადიციული ცხოვრების წესის პროპაგანდა და კანონმდებლობით დამტკიცება, სადაც პირდაპირ აიძულებენ ქვეყნებს, რომ ეს აღასრულონ. ეს არის ხალხის ტრადიციების განადგურება“, - თქვა სოსიაშვილმა.