გიორგი ვოლსკი: პოლიციაზე შეტევა ხორციელდება არა მხოლოდ იმიტომ, რომ სახელმწიფოს რევოლუცია აარიდეს, არამედ იმიტომ, რომ სახელმწიფო დგას გარკვეულ პრინციპებზე

იმდენად თაღლითურად ჩამოაყალიბეს ეს კამპანია პოლიციის საწინააღმდეგოდ, რომ სხვა არაფერი იკითხება, მთავარია შეტევა პოლიციაზე, - განაცხადა საქართველოს პარლამენტის თავმჯდომარის პირველმა მოადგილემ, გიორგი ვოლსკიმ.

მისივე თქმით, პოლიციაზე შეტევა ხორციელდება არა მხოლოდ იმიტომ, რომ სახელმწიფოს რევოლუცია აარიდეს, არამედ იმიტომ, რომ სახელმწიფო დგას გარკვეულ პრინციპებზე, ეს არ არის საპოლიციო სახელმწიფო და მთავრობის წარმოჩენა უნდათ ისე, თითქოს სისტემური ძალადობაა.

„ამას გვთავაზობენ, თაღლითური სქემაა პირდაპირ, თორემ არც არაფერში ენაღვლებათ არც ის გალახული და არც მეორე გალახული, რომელზეც სახელმწიფომ დროული და სწრაფი რეაგირება მოახდინა“, - აღნიშნა გიორგი ვოლსკიმ.

ფრაქცია „ქართული ოცნების“ თავმჯდომარის მოადგილის შეფასებით, დაწყებულია გმირი პოლიციელების გაშავების კამპანია. ლევან მაჭავარიანი ოპონენტების განცხადებას ეხმიანება. მისი თქმით, ცალკეულ ძალადობრივ შემთხვევებს ოპოზიცია, მთლიანად პოლიციელებზე შეტევისთვის იყენებს.