გიორგი ვოლსკი: ახალი არ არის ოპოზიციაში დაპირისპირება. გახსოვთ, გიგი უგულავა ინტენსიურად იმეორებდა, რომ სააკაშვილი არის ჩამოწერილი მანქანა, პოლიტიკურ სანაგვეზე უნდა გადავაგდოთო

გიორგი ვოლსკის თქმით, ოპოზიციაში დაპირისპირება ახალი არ არის. ასე პარლამენტის პირველი ვიცე-სპიკერი მიხეილ სააკაშვილსა და ნიკა მელიას შორის უთანხმოებას გამოეხმაურა.

„ახალი არ არის დაპირისპირება. გახსოვთ, გიგი უგულავა ინტენსიურად იმეორებდა, რომ სააკაშვილი არის ჩამოწერილი მანქანა, პოლიტიკურ სანაგვეზე უნდა გადავაგდოთო. ამას ამბობდა იმის გათვალისწინებით, რომ სააკაშვილი არ იყო პოპულარული იმ ახალგაზრდებში, ვის მომხრეობასაც ისინი ლამობდნენ გარკვეული ფინანსური და პოლიტიკური მხარდაჭერით ქვეყნის გარედან. ახლაც იგივე სიტუაცია მეორდება, თუმცა დღეს უფრო ფართოა ამ დაპირისპირების დიაპაზონი და სწორედაც სააკაშვილს, მის ბანერს უკავშირდება და მიაჩნიათ, რომ ხალხის სიმცირე სწორედ იმით არის განპირობებული, რომ ხელსისხლიანი ადამიანი არ უნდა ლიდერობდეს „ნაცმოძრაობას“. არცერთი მათგანი არ არის ამ ბოროტების მანქანის მიღმა. ან პირდაპირ იყვნენ ჩართულები ამ დანაშაულებრივ საქმიანობაში - 150 კაცი არის მარტო ქუჩაში დახვრეტილი, მათ შორის უმეტესობა ახალგაზრდები“, - ამბობს ვოლსკი.

26 მაისის აქციის შემდეგ, ოპოზიციაში დაპირისპირება გამწვავდა. სააკაშვილი, მელია, გვარამია, ჩერგოლეიშვილი, ბეჟაშვილი, ჟორჟოლიანი და სხვები ერთმანეთის პირისპირ.