გიორგი ვოლსკი არჩევნების გაყალბების ბრალდებაზე: უნდა ჩაიგდო ენა და თქვა - რასაც მეუბნებიან სწორია და ის ალტერნატივა, რასაც გვთავაზობენ, ეს არის ჩვენი საზოგადოებისთვის მისაღები. არჩევნების თემაზე საერთოდ არ არის ლაპარაკი

გიორგი ვოლსკი საპარლამენტო არჩევნების გაყალბების შესახებ ოპოზიციისა და საერთაშორისო აქტორების ბრალდებებს „დღის ქრონიკაში“ გამოეხმაურა. პარლამენტის პირველი ვიცე-სპიკერის განცხადებით, ცენტრალური საარჩევნო კომისიის მუშაობა ავტორიტეტულმა ორგანიზაციამ პოზიტიურად შეაფასა და არჩევნები ლეგიტიმურად ცნო.

მან ასევე აღნიშნა, რომ ბიულეტენზე მელნის გამოჟონვის თემით მანიპულირება აბსურდულია, ქვეყანაში არსებული ეკონომიკური პროგრესი, ტურისტული ბუმი და ფოთის პორტში ჩადებული უმსხვილესი ამერიკული ინვესტიციები კი რეალურ სურათს ასახავს, რომლის უგულებელყოფაც მხოლოდ ვიწრო პოლიტიკურ ინტერესებს ემსახურება.

ვიცე-სპიკერმა კრიტიკულად შეაფასა ევროპელი პარტნიორების პოზიციაც და გაიხსენა უცხოელი პოლიტიკოსების მონაწილეობა თბილისში გამართულ საპროტესტო აქციებში. ვოლსკის თქმით, ევროკავშირის წევრი ქვეყნების საგარეო საქმეთა მინისტრების მხრიდან რუსთაველის გამზირზე დგომა და ახალგაზრდების მობილიზება ქვეყანაში დესტაბილიზაციის მცდელობასა და სისხლისღვრის საფრთხეს შეიცავს, რაც სრულიად მიუღებელია.

„გვქონდა ერთ-ერთ ევროპელ მაღალჩინოსანთან საუბარი. როცა იგივე შეკითხვა ისმება, ოღონდ ცოტა საყვედურის რაკურსით, ვეუბნებით - გაიხსენეთ ევროკავშირის ქვეყნების საგარეო საქმეთა მინისტრები, რომლებიც ქვეყნის პოზიციას წარმოადგენენ და დგანან რუსთაველის პროსპექტზე და ახალგაზრდებს მოუწოდებენ, რომ აქ მეორე მაიდანი მოაწყონ, რაც სისხლისღვრასთან არის დაკავშირებული. რაზეა ლაპარაკი საერთოდ? როგორ შეიძლება ამ თემაზე ვისაუბროთ? თან გეუბნება, რომ ევროპასთან დაკავშირებით შენ არასწორ ინფორმაციას ავრცელებ. უნდა ჩაიგდო ენა და თქვა - რასაც მეუბნებიან სწორია და ის ალტერნატივა, რასაც გვთავაზობენ, ეს არის ჩვენი საზოგადოებისთვის მისაღები. არჩევნების თემაზე საერთოდ არ არის ლაპარაკი“, - განაცხადა ვოლსკიმ.