გიორგი ვოლსკი: ევროპული სტანდარტი ჩვენთვის უცვლელი დარჩა, თავად ევროპა შეიცვალა. სტრუქტურული ცვლილების გარეშე ევროპული დამოკიდებულება ჩვენს მიმართ არ შეიცვლება
ევროპული სტანდარტი ჩვენთვის უცვლელი დარჩა, თავად ევროპა შეიცვალა. სტრუქტურული ცვლილების გარეშე ევროპული დამოკიდებულება ჩვენს მიმართ არ შეიცვლება, - განაცხადა გადაცემაში „EURO ანატომია“ პარლამენტის პირველმა ვიცე-სპიკერმა, გიორგი ვოლსკიმ საქართველო-ევროკავშირის ურთიერთობების გადატვირთვაზე საუბრისას.
მისივე თქმით, როგორც კი პოლიტიკურ ველზე დიდი მოთამაშეები - ჩინეთი, აშშ, რუსეთი და ევროკავშირი იგრძნობენ აუცილებლობას, რომ ერთმანეთთან მოლაპარაკებების გზა არის სწორი და არა არის ატომური შეიარაღების გამოყენება, ეს მთელს მსოფლიოს მისცემს ამოსუნთქვის საშუალებას.
„მთავარია, საზოგადოებამ მსხვილ მასშტაბში დაინახოს ეს პროცესები და არ იყოს კონცენტრირებული მხოლოდ საქართველოსთან დაკავშირებით. თუნდაც, სამხრეთ კავკასიაში მიმდინარე პროცესები რომ განვიხილოთ, არის ზანგეზურის დერეფანი რეალობა, რომელიც შეიძლება ხვალ ამუშავდეს? თუ ამერიკის შეერტებულ შტატებს სწორედაც იმ რეგიონში შემოსვლა სურს, რომელიც ხვალ იქნება გადამწყვეტი რამდენიმე დერეფანი იმისთვის, რომ აზია და დასავლური ბაზრები ერთმანეთს დაუკავშირდნენ? რეალურ გეოგრაფიულ მოცემულობაზე კონტროლი და გავლენა არის ამოცანა, რომელსაც არაერთი ქვეყანა ესწრაფვის“, - აღნიშნა გიორგი ვოლსკიმ.
