გიორგი ვოლსკი: „კოლექტიური ნაცმოძრაობის“ სივრცეში ჩამოყალიბდა საქართველოს წინააღმდეგ მოქმედი სამსახური, რომელსაც შესაძლოა „შეთქმულთა გუნდი“ დავარქვათ

„კოლექტიური ნაცმოძრაობის“ სივრცეში ჩამოყალიბდა საქართველოს წინააღმდეგ მოქმედი სამსახური, რომელსაც შესაძლოა „შეთქმულთა გუნდი“ დავარქვათ, - ასე შეაფასა ჟურნალისტებთან საუბრისას საქართველოს პარლამენტის თავმჯდომარის პირველმა მოადგილე გიორგი ვოლსკიმ გიორგი კანდელაკის კვლევა, სადაც წერია, რომ თბილისი ირანის მიერ აგენტების გადაბირებისა და ტერორისტული ოპერაციების ნაყოფიერ ნიადაგად იქცა.

ვოლსკის თქმით, საქართველოს წინააღმდეგ გალაშქრება გარკვეულ მიზანს ემსახურება.

„კოლექტიური ნაცმოძრაობის“ სივრცეში ჩამოყალიბდა ასეთი სამსახური - საქართველოს წინააღმდეგ მოქმედი სამსახური, რომელსაც შესაძლოა „შეთქმულთა გუნდი“ დავარქვათ. მათ აქვთ თავიანთი ფუნქციები, თავიანთი საქმიანობის მიმართულებები. ამაში იღებენ ხელფასს. ჯო უილსონი არის ადამია, რომელიც ერთი პერიოდი რუსეთის დროშით დადიოდა, სამკერდე ნიშანი ეკეთა. მაშინ ეს პერიოდი იყო და დღეს სხვა ინტერესები აქვს.

აქედან გამომდინარე, ჩვენ ერთადერთი დასკვნა შეგვიძლია გავაკეთოთ, გალაშქრება საქართველოს წინააღმდეგ გარკვეულ მიზანს ემსახურება, წინააღმდეგ შემთხვევაში, როგორ შეიძლება საქართველოს ან ეკონომიკური, ან პოლიტიკური მოკავშირეობა დააბრალო ირანთან“, - აღნიშნა მან.

„ქართული ოცნების“ ხელმძღვანელობით, თბილისი ირანელი რეკრუტირებისა და ტერორისტული ოპერაციების ნაყოფიერ ნიადაგად იქცა, - ამ სათაურით აქვეყნებს ამერიკული გამოცემა The Washington Free Beacon სტატიას, რომლის ავტორი, ადამ კრედო, ოპოზიციის მხარდამჭერების - ჯო უილსონისა და ლუკ კოფის გარდა, ოპოზიციონერ გიორგი კანდელაკის განცხადებებსაც ეყრდნობა.