გივი მიქანაძე ერთიან ეროვნულ გამოცდებში ბრალდებული და მსჯავრდებული აბიტურიენტების მონაწილეობაზე: მინდა ვისარგებლო შემთხვევით და მადლობა ვუთხრა იუსტიციის სამინისტროსა და სპეციალურ პენიტენციურ სამსახურს ორგანიზაციული უზრუნველყოფისთვის
საქართველოს განათლების მეცნიერებისა და ახალგაზრდობის მინისტრის ცნობით, წელს ერთიან ეროვნულ გამოცდებზე 58 არასრულწლოვანი და სრულწლოვანი ბრალდებულები და მსჯავრდებულები არიან დარეგისტრირებული. ამ თემაზე მინისტრმა „დღის ქრონიკაში“ ისაუბრა და შესაბამის უწყებებს თანამშრომლობისთვის მადლობა გადაუხდა.
„პირველ საგამოცდო დღეს, მათგან 30-მა უკვე მიიღო მონაწილეობა [პროცესში]. მინდა ვისარგებლო შემთხვევით და მადლობა ვუთხრა იუსტიციის სამინისტროსა და სპეციალურ პენიტენციურ სამსახურს ორგანიზაციული უზრუნველყოფისთვის. მთელმა პროცესმა ძალიან უმტკივნეულოდ და ყოველგვარი გამოწვევისა და პრობლემის გარეშე ჩაიარა - როგორც ბრალდებულებისა და მსჯავრდებულების ტრანსპორტირებამ, ასევე, მათმა ჩართულობამ საგამოცდო პროცესში“, - აღნიშნა მინისტრმა.
მისივე თქმით, დღეს თბილისის საგამოცდო ცენტრებში 20 ასეთი აბიტურიენტი იყო მიყვანილი, ქუთაისში კი - 10. დანარჩენი რეგისტრირებული ბრალდებული და მსჯავრდებული პროცესში შემდეგ დღეებში ჩაერთვება.
„ეს თანამშრომლობა კიდევ ერთხელ აჩვენებს, რომ ყველა სახელმწიფო უწყება მაქსიმალურად ორიენტირებულია იმისთვის, რომ ნებისმიერი პირის კონსტიტუციით გათვალისწინებული და უზრუნველყოფილი განათლების ხელმისაწვდომობის უფლება იყოს დაცული და, შესაბამისად, ამ საგამოცდო პროცესში მათი ჩართვა ყოველგვარი პრობლემის გარეშე ხდება“, - განაცხადა მიქანაძემ.
