გივი მიქანაძე: პირველ ეტაპზე, 15 სექტემბრისთვის ყველა პირველკლასელი იქნება უზრუნველყოფილი სასკოლო ფორმით, ხოლო პირველი სემესტრის განმავლობაში - ოქტომბერსა და ნოემბრის ბოლოს უკვე შემოვა დამზადებული ფორმები, რომლებითაც დანარჩენი 5 კლასი - მეექვსე კლასის ჩათვლით იქნება უზრუნველყოფილი

ახალი სასწავლო წლიდან, პირველიდან მეექვსე კლასის ჩათვლით, სკოლის მოსწავლეები სასკოლო ფორმებით იქნებიან უზრუნველყოფილები. განათლების მინისტრის განცხადებით, ბაზრის კვლევის საფუძველზე შეირჩა ჩინური კომპანია, რომელთანაც ხელშეკრულება გაფორმდა. ეს კომპანია სასკოლო ფორმებს საქართველოში სამ ეტაპად გამოაგზავნის. ის ოჯახები, რომელთა სოციალური მდგომარეობა ჯანდაცვის სამინისტროს მიერ 65 000 ან ნაკლები ქულით არის შეფასებული, ფორმას უფასოდ მიიღებენ.

„პირველ ეტაპზე, 15 სექტემბრისთვის ყველა პირველკლასელი უზრუნველყოფილი იქნება სასკოლო ფორმით. ხოლო ეტაპობრივად, პირველი სემესტრის განმავლობაში - ოქტომბერსა და ნოემბრის ბოლოს უკვე შემოვა დამზადებული ფორმები, რომლებითაც დანარჩენი 5 კლასი - მეექვსე კლასის ჩათვლით იქნება უზრუნველყოფილი სასკოლო ფორმებით.

უახლოეს დღეებში ჩვენ საბოლოოდ განვსაზღვრავთ ფასს სასკოლო ფორმასთან დაკავშირებით, რომელიც იქნება ძალიან კონკურენტუნარიანი იმ ფასთან, რაც კერძო სკოლებშია. ამასთანავე შეგვიძლია, ვთქვათ, რომ ბევრად ბიუჯეტური იქნება, ვიდრე მშობელს უჯდება ყოველი წლის განმავლობაში სკოლისთვის ბავშვის შესაბამისი ჩაცმულობით უზრუნველყოფა”, - განაცხადა განათლების, მეცნიერებისა და ახალგაზრდობის მინისტრმა გივი მიქანაძემ.

„საწარმოო პროცესის თითოეულ ეტაპზე ხარისხის მკაცრ კონტროლს ვახორციელებთ და მაქსიმუმს ვაკეთებთ იმისათვის, რომ უზრუნველვყოთ თითოეული დამზადებული სამოსის უმაღლესი ხარისხი. იმედი გვაქვს წარმატებული და ნაყოფიერი თანამშრომლობა გვექნება”, - განაცხადა ქარხნის დირექტორმა ჰუანგ სუისუიმ.