გივი მიქანაძე: უმაღლესი განათლების დაფინანსების ახალი მოდელი ქმნის საფუძველს, რომ სახელმწიფო დაფინანსება მიმართული იყოს, არა მხოლოდ უმაღლესი განათლების ხელმისაწვდომობის ზრდისკენ, არამედ განათლების ხარისხის გაუმჯობესების, კვლევითი პოტენციალის გაძლიერების და უნივერსიტეტების გრძელვადიანი ინსტიტუციური განვითარების უზრუნველსაყოფად

უმაღლესი განათლების დაფინანსების ახალი მოდელი ქმნის საფუძველს, რომ სახელმწიფო დაფინანსება მიმართული იყოს, არა მხოლოდ უმაღლესი განათლების ხელმისაწვდომობის ზრდისკენ, არამედ განათლების ხარისხის გაუმჯობესების, კვლევითი პოტენციალის გაძლიერების და უნივერსიტეტების გრძელვადიანი ინსტიტუციური განვითარების უზრუნველსაყოფად, - განაცხადა განათლების, მეცნიერებისა და ახალგაზრდობის მინისტრმა გივი მიქანაძემ საქართველოს პარლამენტში, ინტერპელაციის ფორმატში, უმაღლესი განათლების სისტემის რეფორმის შესახებ საუბრისას.

მისივე თქმით, მთავრობის მიერ დაფუძნებულ უმაღლეს საგანმანათლებლო დაწესებულებებში, აკადემიური უმაღლესი განათლების პირველი და მეორე საფეხურის საგანმანათლებლო პროგრამებზე, საქართველოს მოქალაქეების სწავლება სრულად დაფინანსება სახელმწიფოს მიერ.

„უმაღლესი განათლების დაფინანსების ახალი მოდელი ითვალისწინებს აკადემიური პროგრამების განსხვავებულ ღირებულებებს, სწავლის სფეროების და უმაღლესი განათლების საფეხურების მიხედვით. განსაზღვრავს დივერსიფიცირებული დაფინანსების სქემას, რომელიც ითვალისწინებს უნივერსიტეტების დაფინანსებას სტუდენტთა რაოდენობრივი მაჩვენებლის გათვალისწინებით, სასწავლო პროცესთან და სტუდენტის მომსახურებასთან დაკავშირებული საბაზო ხარჯების დასაფარად.

ხაზგასმით უნდა აღინიშნოს, რომ წინასწარი შეფასებები, თითქოს რომელიმე უნივერსიტეტი ვერ აკმაყოფილებს ავტორიზაციის, ან აკრედიტაციის სტანდარტებს, არ ეფუძნება დადგენილ ფაქტობრივ გარემოებებს და წარმოადგენს მხოლოდ რეალობას აცდენილი სუბიექტური შეფასებით ინტერპრეტაციის მიზანმიმართულ მცდელობას“, - აღნიშნა გივი მიქანაძემ.

მინისტრმა თქვა, რომ რეალობას არ შეესაბამება მტკიცება, თითქოს აბიტურიენტებს იძულების წესით ეზღუდებათ არჩევანის თავისუფლება. არც ერთ აბიტურიენტს და სტუდენტს არ ერთმევა განათლების მიღების უფლება.

მიქანაძემ ასევე ისაუბრა საკადრო პოლიტიკაზეც.

„რეფორმის ფარგლებში, სახელმწიფოს მიერ დაფუძნებული უმაღლესი საგანმანათლებლო დაწესებულებების მართვის მოდელი ეფუძნება რესურსების ოპტიმიზაციისა და აკადემიური კონცენტრაციის პრინციპს - ერთი ქალაქი, ერთი ფაკულტეტი, რომლის მიზანია აკადემიური და ინფრასტრუქტურული რესურსების გაძლიერება და ხარისხიანი განათლების უზრუნველყოფა.

მილევად რეჟიმზე გადასვლა არ გულისხმობს საგანმანათლებლო პროგრამის გაუქმებას, ხოლო პროგრამის გადატანა არ იწვევს პერსონალის ავტომატურ გათავისუფლებას. ყველა შესაბამისი გადაწყვეტილება მიიღება უნივერსიტეტების კოლეგიური მართვის ორგანოების მიერ“, - განამარტა გივი მიქანაძემ.