გოგა ხაინდრავა „ფორმულას“ დეზინფორმაციის გავრცელებაში ადანაშაულებს: უნდა დადგინდეს სიმართლე და სიმართლე არის ერთი, რომ თავიდან ბოლომდე ყველაფერი, რაც იყო ნათქვამი ტელეკომპანია „ფორმულას“ ეთერში არის სიცრუე და ცილისწამება

კინორეჟისორი გოგა ხაინდრავა „ფორმულას“ დეზინფორმაციის გავრცელებაში ადანაშაულებს. საქმეზე საქალაქო სასამართლოში სხდომა გაიმართა. განაჩენს მოსამართლე 14 ივლისს გამოაცხადებს.

გოგა ხაინდრავას განცხადებით, „ფორმულას“ ეთერში გასული სიუჟეტები არა მხოლოდ მისი, არამედ სახელმწიფოს რეპუტაციის შელახვას ემსახურება.

„საქმეში არის ნახსენები პრემიერ-მინისტრი, შს მინისტრი, სუს-ის უფროსი, სუს-ის თანამშრომელი, სასაზღვრო დაცვის პოლიციის თანამშრომლები და ყველანი არიან დადანაშაულებული სახელმწიფო დანაშაულში. ამიტომ მე ვფიქრობ, რომ ეს საქმე გაგრძელდება, გაგრძელდება ძიებაში აუცილებლად იმიტომ, რომ უნდა დადგინდეს სიმართლე. და სიმართლე არის ერთი, რომ თავიდან ბოლომდე ყველაფერი, რაც იყო ნათქვამი ტელეკომპანია „ფორმულას“ ეთერში, არის სიცრუე და ცილისწამება და არის მძიმე დანაშაული. უნდა გაირკვეს ვინ არის ამაში დამნაშავე“, - განაცხადა გოგა ხაინდრავამ.

სასამართლო პროცესის შემდეგ განცხადება გააკეთა „ფორმულას“ ადვოკატმაც. ეთერ ქათამაძის თქმით, სასამართლო განხილვები დასრულებულია და ტელეკომპანია მოსამართლის გადაწყვეტილებას ელის.