გოგა ხაინდრავას მიერ „ფორმულას“ წინააღმდეგ შეტანილი საჩივრის თაობაზე პროკურატურაში გამოკითხვაზე ტელეკომპანიის ჟურნალისტი ნატუკა ლომიძე იმყოფებოდა

გოგა ხაინდრავას მიერ ტელეკომპანია „ფორმულას“ წინააღმდეგ შეტანილი საჩივრის თაობაზე თბილისის პროკურატურაში გამოკითხვაზე ტელეკომპანიის ჟურნალისტი ნატუკა ლომიძე იმყოფებოდა. საქმე ეხება ეთერში გასულ სამ სიუჟეტს, რომლებშიც სუსსა და გოგა ხაინდრავას არალეგალ მიგრანტთა შემოყვანაში დასდეს ბრალი.

ადვოკატის თქმით, ჟურნალისტმა პასუხები გასცა კითხვებს, რომლებიც სწორედ ეთერში გასულ სიუჟეტს ეხებოდა, თუმცა მან წყაროს ვინაობა არ გაამხილა.

„გამოკითხვა ეხებოდა ჟურნალისტურ საქმიანობას, სიუჟეტის ირგვლივ იყო კითხვები დასმული, ისარგებლეს საქართველოს სისხლის სამართლის საპროცესო კოდექსით და ასევე სიტყვისა და გამოხატვის თავისუფლების შესახებ კანონის ნორმებზე დაყრდნობით, წყაროს ვინაობა, ბუნებრივია, გახმოვანებული არ ყოფილა“, - განაცხადა ადვოკატმა ბექა ბასილაიამ.