გურამ დუმბაძე: მონიტორინგის მთელი რიგი მექანიზმები გვაქვს სახელმწიფო შესყიდვების ნაწილში, ჩვენი ყველა რეფორმა მიმართულია პრევენციული მექანიზმებისკენ, ჩვენ ნებისმიერ დროს შეიძლება გადავამოწმოთ შესყიდვა, ასე რომ, როგორც შემსყიდველს, ისე ეკონომიკურ ოპერატორს ყოველთვის ექნება განცდა, რომ გარე, დამოუკიდებელი მხარე შეამოწმებს საქონლის მიღების პარამეტრებს, ხარისხსა და ვადებს

მონიტორინგის მთელი რიგი მექანიზმები გვაქვს სახელმწიფო შესყიდვების ნაწილში, ჩვენი ყველა რეფორმა, იგივე ნაკლოვანებების იდენტიფიცირების კუთხით, არის მიმართული პრევენციული მექანიზმებისკენ, - განაცხადა საქართველოს მთავრობის ეფექტიანობის დეპარტამენტის უფროსმა გურამ დუმბაძემ გადაცემა „ბიზნესპარტნიორში“. მისივე თქმით, სახელმწიფო შესყიდვების სააგენტოს ჰყავს კვალიფიციური გუნდი, რომელიც სხვადასხვა სპეციალობების მქონე ადამიანებით არის დაკომპლექტებული და მონიტორინგის პროცესში ჩართულები არიან როგორც სააგენტოს წარმომადგენლები, ისე მთავრობის ეფექტიანობის დეპარტამენტი.

„ჩვენ მონიტორინგის მთელი რიგი მექანიზმები გვაქვს სახელმწიფო შესყიდვების ნაწილში. ჩვენი ყველა რეფორმა, იგივე ნაკლოვანებების იდენტიფიცირების კუთხით, არის მიმართული პრევენციული მექანიზმებისკენ, რათა არ დაველოდოთ, რომ რაღაც დაშავდება და შემდგომ გამოვავლინოთ. როდესაც ჩვენ ვთქვით, რომ 500 000 ლარის ზევით სააგენტო გამოაცხადებს შესყიდვას, ეს არ ნიშნავს, რომ რაღაც ტექნიკური დავალება რომ მივაწოდეთ სააგენტოს, აუცილებლად იმ ტექნიკური დავალებით გამოაცხადებს. აქ იქნება მთელი რიგი კონსულტაციები შემსყიდველთან, კერძო სექტორთან, ისეთ საკითხებზე, როგორიცაა - ხარისხობრივი პარამეტრები, საბოლოო კომპონენტები, პასუხობს თუ არა საჭიროებებს, ასევე რაოდენობრივი საკითხები. თავიდანვე მოხდება გადაზღვევა ყველა პარამეტრისა და რაოდენობის, რასაც შევისყიდით. ჩაბარების ნაწილში, ზუსტად ის უნდა მივიღოთ, რასაც გამოვაცხადებთ. სააგენტოს წარმომადგენელი ჩართული იქნება როგორც მთელ ამ პროცესში, ისე მიღება-ჩაბარების ნაწილში. სააგენტოში გვყავს ძალიან კვალიფიციური გუნდი, ისინი სპეციალიზებულები არიან სხვადასხვა სფეროში, ეს შეიძლება იყოს ფარმაცევტიკა, სოფლის მეურნეობის ტექნიკა და მათ დეტალურად იციან კონკრეტული ტექნიკური საშუალებები, ტექნიკური მონაცემები. მათ შეუძლიათ მიწერონ ლაბორატორიებს, გადაამოწმონ ექსპერტიზები და საბოლოო გადაწყვეტილება ამის მიხედვით მიიღება. მონიტორინგის პროცესში ასევე ჩართულია ჩვენი დეპარტამენტი. ჩვენ, ნებისმიერ დროს, შეიძლება გადავამოწმოთ ნებისმიერი შესყიდვა, თუ დაგვჭირდა ექსპერტიზაც ჩავრთოთ. ასე რომ, როგორც შემსყიდველს, ისე ეკონომიკურ ოპერატორს ყოველთვის ექნება განცდა, რომ გარე, დამოუკიდებელი მხარე შეამოწმებს საქონლის მიღების პარამეტრებს, საქონლის ხარისხსა და ვადებს,“- აღნიშნა გურამ დუმბაძემ.