გურამ მაჭარაშვილი ევროპარლამენტის რეზოლუციაზე: მიუხედავადა იმისა, რომ ასეთი ტიპის ევრორეზოლუციები მისი შინაარსიდან გამომდინარე უკვე აღარ წარმოადგენს ძალიან დიდი მნიშვნელობის დოკუმენტებს, მაინც საყურადღებოა იმ თვალსაზრისით, რომ ევრობიუროკრატიას ჯერ კიდევ აქვს მიზანში ამოღებული საქართველოს სახელმწიფო

საზოგადოებას მორიგ ჯერზე შეგვიძლია, ვუთხრათ, რომ ასეთი ტიპის რეზოლუციები ნიშნავს იმას, რომ რა თქმა უნდა, ევრობიუროკრატია არ მოისვენებს მიუხედავად იმისა, რომ პირველი ეტაპი საქართველოში ვერ მოიგო და მისი მიზნები აქ ვერ განხორციელდა, ვგულისხმობ მეორე ფრონტის გახსნას, სანქციების დაწესებას, ეკონომიკის ჩამოშლას და ასე შემდეგ, - განაცხადა „ხალხის ძალის“ აღმასრულებელმა მდივანმა გურამ მაჭარაშვილმა გადაცემაში „დღის ქრონიკა“ ევროპარლამენტის რეზოლუციის შეფასებისას.

მისი თქმით, აღნიშნული რეზოლუცია მისი შინაარსიდან გამომდინარე მნიშვნელოვანი დოკუმენტი აღარ არის.

„მიუხედავადა იმისა, რომ ასეთი ტიპის ევრორეზოლუციები მისი შინაარსიდან გამომდინარე უკვე აღარ წარმოადგენს ძალიან დიდი მნიშვნელობის დოკუმენტებს, ვფიქრობ, მაინც საყურადღებოა იმ თვალსაზრისით, რომ ევრობიუროკრატიას ჯერ კიდევ აქვს მიზანში ამოღებული საქართველოს სახელმწიფო, რადგან ის არ დაემორჩილა იმ გლობალურ წესებს, რომელსაც „დიფ სთეითი“ ახორციელებს ამ შემთხვევაში ევრობიუროკრატიის სახით.

იქ არის აბსოლუტურად უარგუმენტო მოთხოვნები. ადრე თუ შეფარულად ამბობდნენ, ახლა გახსნილად გვეუბნებიან, რომ მხოლოდ მათი წარმომადგენლებისთვის უნდა იყოს აქ უვიზო მიმოსვლა. ამიტომ ყურადღება გასამახვილებელია იმ მიმართულებით, რომ ევრობიუროკრატია რა თქმა უნდა, ისევ გადადგამს ისეთ ნაბიჯებს, რომ როგორმე დააზიანოს ქართული სახელმწიფო, ეროვნული ხელისუფლება, რომელიც ვერ დაიმორჩილა. აი, ეს იკითხება მორიგ ჯერზე ამ რეზოლუციაში“, - აღნიშნა გურამ მაჭარაშვილმა.

ევროპარლამენტმა საქართველოს შესახებ რასა იუკნევიჩიენეს მიერ მომზადებული რეზოლუციის პროექტი მიიღო. ანგარიშში საუბარია ხელისუფლების წარმომადგენლების სანქცირებაზე. ევროპარლამენტი ასევე მოუწოდებს წევრ ქვეყნებს, თავი შეიკავონ „ქართულ ოცნებასთან“ შეხვედრებისგან. დოკუმენტში ასევე საუბარია ტელეკომპანიების, მათ შორის „იმედის“ წინააღმდეგ სანქციებზე.

გარდა ამისა, რეზოლუციის მიხედვით, ევროპარლამენტი მოუწოდებს კომისიას შექმნას მექანიზმი, რომლის საშუალებითაც სამოქალაქო საზოგადოების აქტივისტებს, ჟურნალისტებსა და სტუდენტებს შეუნარჩუნდებათ უვიზო წვდომა ევროკავშირში.