გურამ მაჭარაშვილი: ის არ გვაკლდა, რომ ორიგინალი სააკაშვილის ბოდვებზე გაგვეკეთებინა კომენტარი და ახლა იმის ავატარს უნდა ვდიოთ

ის არ გვაკლდა, რომ ორიგინალი სააკაშვილის ბოდვებზე გაგვეკეთებინა კომენტარი და ახლა იმის ავატარს უნდა ვდიოთ, - განაცხადა პარტია „ხალხის ძალის“ აღმასრულებელმა მდივანმა, დეპუტატმა გურამ მაჭარაშვილმა.

მისივე თქმით, სააკაშვილმა საკუთარ ასლზეც კი იეჭვიანა და თქვა, რომ ჩემზე უკეთესი იქნება, მაგრამ მე ვიქნებიო, არაფერი შეგეშალოთო.

„„ნაცმოძრაობას“ აქვს ძალიან დიდი დილემა, არა მარტო ის, თუ ვის აირჩევენ ან თავმჯდომარედ, ან პოლიტსაბჭოს წევრებად, არამედ აქვთ იმის შიშიც, რომ ვის გამოეცხადება სააკაშვილის სული საღამოს თუ არ არის კმაყოფილი ამ გადაწყვეტილებებით. დიდი სურვილი ბევრსაც არ ექნება ისეთ პოლიტსაბჭოში წევრობაზე, სადაც ნებისმიერ დროს შეიძლება გამოგეცხადოს სააკაშვილი და გიკარნახოს გადაწყვეტილებები“, - აღნიშნა გურამ მაჭარაშვილმა.

„ნაციონალური მოძრაობა“ პოლიტსაბჭოს სხდომას მართავს. პოლიტიკური საბჭოს სხდომას თინა ბოკუჩავა არ ესწრება. სხდომაზე პარტიის ყრილობასთან დაკავშირებულ საკითხებზე მსჯელობენ, ასევე განისაზღვრება ყრილობის ჩატარების თარიღი. პარალელურად, პოლიტიკური შეფასებები კეთდება მიხეილ სააკაშვილის განცხადებაზე, რომელიც მისი ხელოვნური ინტელექტის ავატარს ეხება. ნაციონალურ მოძრაობაში ამ იდეას სერიოზულად განიხილავენ, მმართველ გუნდში კი მიაჩნიათ, რომ სააკაშვილი ილუზიების ვირტუალიზაციით არის დაკავებული.