გურამ მაჭარაშვილი ოპოზიციაში არეულობაზე: ეს მათი ბუნებრივი მოცემულობაა

რაც შეეხება მათ არეულობას, ეს მათი ბუნებრივი მოცემულობაა, - ასე აფასებს „ხალხის ძალის“ აღმასრულებელი მდივანი გურამ მაჭარაშვილი რადიკალებში არსებული დაპირისპირებას. მისი თქმით, ოპოზიციის მიმართ ნდობა დიდი ხანია საზოგადოებას დაკარგული აქვს. „რომელ საზოგადოებაში დადიან? საზოგადოების აბსოლუტური უმრავლესობა არის მომხრე იმ პოლიტიკის, რასაც ჰქვია ოჯახური ღირებულება, რისი მომხრეც ეგენი არ არიან. საზოგადოების აბსოლუტური უმრავლესობა მომხრეა რწმენის, მართლმადიდებელი ეკლესიის, პატრიარქის, ეს ხალხი ამათ ებრძვის. ამიტომაც იციან, რომ საზოგადოებაში დასაყრდენი არ აქვთ. რაც შეეხება მათ არეულობას, ეს მათი ბუნებრივი მოცემულობაა“, - განაცხადა გურამ მაჭარაშვილმა. ამჯერად დაპირისპირება ოპოზიციაში თამარ ჩერგოლეიშვილის განცხადებას მოჰყვა, რომელმაც „ტვ პირველს“ ერთ-ერთ ფეისბუქ-პოსტში „უბორნია“ უწოდა და განაცხადა, რომ ამ ტელევიზიაში ის დაბლოკილია. ჩერგოლეიშვილის მხრიდან ჟურნალისტების მიმართ შეურაცხყოფას გიორგი ვაშაძე პირად შეურაცხყოფად იღებს.