იაპონიაში ადამიანებისთვის ღორის თირკმლების გადანერგვის ტესტირებისთვის ემზადებიან

იაპონიაში ადამიანებისთვის ღორის თირკმლების გადანერგვის ტესტირებისთვის ემზადებიან - 2033 წლისთვის ასეთი ოპერაციები შესაძლოა სტანდარტული გახდეს. საკითხზე მეიძის უნივერსიტეტთან არსებული სტარტაპი PorMedTec მუშაობს. უნივერსიტეტში გენმოდიფიცირებული ღორების გამოყვანა უკვე დაიწყეს, ცხოველისგან ადამიანისთვის თირკმლების გადანერგვის კლინიკური გამოცდების ჩატარება კი 2028 წელს იგეგმება.

„ჩვენ განზრახული გვაქვს, ეს მეთოდი განვავითაროთ, როგორც თირკმლის მძიმე უკმარისობის მქონე პაციენტების მკურნალობის ერთ-ერთი ვარიანტი - ადამიანისგან ადამიანზე ტრანსპლანტაციასა და დიალიზთან ერთად“, - განაცხადა PorMedTec-ის ხელმძღვანელობამ.

პროექტის დამტკიცების შემთხვევაში, ტესტირება ერთდროულად იაპონიის ორ საავადმყოფოში ჩატარდება. გამოცემა აღნიშნავს, რომ იაპონიისთვის ეს პირველი მსგავსი ტესტირება იქნება.

სტარტაპი ვარაუდობს, რომ პირობით ნებართვას ცხოველებიდან ადამიანებზე ორგანოების გადანერგვაზე 2030 წელს მიიღებს, ხოლო 2033 წლისთვის ადამიანისთვის ღორის თირკმლების ტრანსპლანტაციას თერაპიის სტანდარტულ მეთოდად აქცევს.

იაპონური კომპანია ამ პროექტში თანამშრომლობს აშშ-ის ბიოტექნოლოგიურ კომპანია eGenesis Inc.-თან, რომლისგანაც გენმოდიფიცირებულ ღორის უჯრედებს იღებს. რეციპიენტის ორგანიზმის მიერ გადანერგილი ორგანოების უარყოფის თავიდან აცილების მიზნით, ღორის ორგანიზმში 69 გენეტიკური მოდიფიკაცია იქნება შეტანილი.