ირაკლი ჭეიშვილი: ჩვენი ქვეყნის მთლიანობაზე ორკესტრირებული შეტევა მიმდინარეობს - თითქოს, ერთგვარად პირს გვისინჯავენ, თუ არის შესაძლებელი, აფხაზეთის და ცხინვალის სანაცვლოდ რაიმე დივიდენდები ან ევროკავშირისკენ წინსვლა მიიღოს ქვეყანამ. 32 კი არა, 132 წელი რომ გავიდეს, იქნება ჩვენი ტკივილი, სანამ ჩვენი აფხაზი და ოსი ძმები არ იქნებიან ერთ ოჯახში, როგორც აქამდე ვცხოვრობდით გაერთიანებულ საქართველოში

ჩვენი ქვეყნის მთლიანობაზე ორკესტრირებული შეტევა მიმდინარეობს, - განაცხადა გადაცემაში „დღის ქრონიკა“ საპარლამენტო უმრავლესობის წევრმა ირაკლი ჭეიშვილმა.

მან ამ საკითხზე გიორგი ბარამიძის, მიხეილ სააკაშვილის და ნიკა გვარამიას განცხადებების შესახებ ისაუბრა.

„გია ბარამიძემ დაიწყო და დანაშაულს აბრალებდა ჩვენს მაშინდელ სამხედროებს. შემდეგ იყო მიხეილ სააკაშვილის განცხადება, რომ თურმე აფხაზებს ჩვენ ვეზიზღებით. იმის შემდეგ კიდევ გვარამია არ ჩერდება, ორი კვირაა, განცხადებას განცხადებაზე აკეთებს. თითქოს, ერთგვარად პირს გვისინჯავენ, თუ არის შესაძლებელი, აფხაზეთის და ცხინვალის სანაცვლოდ რაიმე დივიდენდები ან ევროკავშირისკენ წინსვლა მიიღოს ქვეყანამ. ნურას უკაცრავად, 32 კი არა, 132 წელი რომ გავიდეს, იქნება ჩვენი ტკივილი, სანამ ჩვენი აფხაზი და ოსი ძმები არ იქნებიან ერთ ოჯახში, როგორც აქამდე ვცხოვრობდით გაერთიანებულ საქართველოში.

ანუ ერთგვარად, ორკესტრირებულად ხდება ეს ყველაფერი. არის მინიშნებები, რომ ერევანმა მოიშუშა ყარაბაღი და ამის შემდეგ გაიხსნა ევროპისკენ ერევნის გზა. ეს ხომ მინიშნებაა, რომ რაღაცები უნდა დავთმოთ რაღაცების სანაცვლოდ. რა უნდა დავთმოთ - ჩვენი ტკივილი? არავითარ შემთხვევაში, სანამ „ქართული ოცნება“ არის ხელისუფლებაში, მსგავს ნაბიჯებს ჩვენ არ გადავდგამთ“, - განაცხადა ჭეიშვილმა.