ირაკლი ჭეიშვილი: ის, რომ გვაკრიტიკებენ, თითქოს ყაზახეთთან ურთიერთობის გაღრმავებით ჩვენ ვშორდებით ევროპას, ასეთი კომენტარების გაკეთება მხოლოდ ჩვენი ქვეყნის მტრებს შეუძლიათ. შუა აზიის ქვეყნებში ყაზახეთი ითვლება ეკონომიკურად ლიდერ ქვეყნად. ჩვენ გვაქვს ძლიერი ეკონომიკური ურთიერთობები ყაზახეთთან

შუა აზიის ქვეყნებში ყაზახეთი ითვლება ეკონომიკურად ლიდერ ქვეყნად. ჩვენ გვაქვს ძლიერი ეკონომიკური ურთიერთობები ყაზახეთთან და ამ ახალ ეტაპზე კიდევ უფრო გაღრმავდება ჩვენი ურთიერთობები. დაკავშირებადობის კუთხითაც გაფართოვდება არეალი. ჩვენი როლი ყველამ კარგად იცის დაკავშირებადობის კუთხით, - განაცხადა „დღის ქრონიკასთან“ საპარლამენტო უმრავლესობის წევრმა ირაკლი ჭეიშვილმა პრემიერ-მინისტრის ყაზახეთში ვიზიტის შეფასებისას.

მისი თქმით, ყაზახეთთან სტრატეგიული პარტნიორობის ხელშეკრულების გაფორმება ორ ქვეყანას ურთიერთობის ახალ ეტაპზე გადაიყვანს.

„ის, რომ დღე გვაკრიტიკებენ, თითქოს ყაზახეთთან ურთიერთობის გაღრმავებით ჩვენ ვშორდებით ევროპას, ასეთი კომენტარების გაკეთება მხოლოდ ჩვენი ქვეყნის მტრებს შეუძლიათ. ყაზახეთთან ჩვენ წლებია ურთიერთობა გვაქვს, მაშინ, როდესაც ევროპასთანაც მჭიდრო ურთიერთობაში ვიყავით და აბსოლუტურად არ უშლიდა ერთმანეთს ხელს. ის, რომ ყაზახეთიდან არაერთი ინვესტიცია არის საქართველოში განხორციელებული და განსაკუთრებით აჭარაში, ეს ყველამ იცის. ის, რომ დღევანდელი ხელშეკრულება სტრატეგიული პარტნიორობის, ის, რომ თუნდაც პოლიტიკური მოკავშირე გეყოლება ყაზახეთის სახით, რომელიც შუა აზიის ქვეყნებში არის ლიდერი ქვეყანა და არის ეკონომიკურად ძლიერი ქვეყანა, ეს ჩვენი ქვეყნისთვის არის მხოლოდ კარგის მომტანი.

ასე რომ პრემიერის ვიზიტი და ეს ფორმა, რა ფორმითაც ჩვენ ურთიერთობის ახალ ეტაპზე გადავდივართ, დადებითად უნდა შეფასდეს და მისასალმებელია“, - განაცხადა ირაკლი ჭეიშვილმა.

საქართველოსა და ყაზახეთს შორის ურთიერთობები სტრატეგიული პარტნიორობის დონეზე გადავიდა. შესაბამის დოკუმენტს ირაკლი კობახიძემ და ყაზახეთის პრეზიდენტმა ყასიმ-ჟომართ თოყაევმა ყაზახეთში გამართული ოფიციალური ვიზიტის ფარგლებში მოაწერეს ხელი.