ირაკლი კირცხალია: როდის დასრულდება ევრობიუროკრატიის მხრიდან ჩვენდამი არსებული დამოკიდებულება? მაშინ, როცა ევროპაში საზოგადოება უბრალოდ ციფრებს შეხედავს. ფაქტია, რომ დღეს კლასიკური საბჭოთა მეთოდებით მოქმედებენ

როდის დასრულდება ევრობიუროკრატიის მხრიდან ჩვენდამი არსებული დამოკიდებულება? მაშინ, როცა ევროპაში საზოგადოება უბრალოდ ციფრებს შეხედავს, - განაცხადა გადაცემაში „იმედი Live” საპარლამენტო უმრავლესობის ლიდერმა ირაკლი კირცხალიამ.

მისივე თქმით, აბსურდია, როდესაც საქართველოს ღირებულებებზე აგენტი ესაუბრება.

“სრული აბსურდია, როდესაც ღირებულებებზე აგენტი გესაუბრება. ეს კომედიასთან ერთად შეურაცხმყოფელია. როდის დასრულდება ევრობიუროკრატიის მხრიდან ჩვენდამი არსებული დამოკიდებულება? მაშინ, როცა ევროპაში საზოგადოება უბრალოდ ციფრებს შეხედავს, შეხედავს ევროკავშირის წილს მსოფლიო ეკონომიკაში რა იყო და რა არის დღეს, როდესაც გადართავს ტელევიზიის სხვადასხვა არხზე და ხედავს ცენზურას, BBC-ის მაგალითს მოგიყვანთ, რომელიც ოქროს სტანდარტად და მეტრად მიიჩნეოდა, მარტო ჩვენი ქვეყნის მიმართ რა იკადრეს. როცა საზოგადოება აქედან გამოფხიზლდება და დარწმუნებული ვარ ამ გზას ადგას, მაშინ მიხვდებიან, რომ სხვა პოლიტიკის დროა“, - განაცხადა კირცხალიამ.

საპარლამენტო უმრავლესობის ლიდერის შეფასებით, საქართველოს წინააღმდეგ ევრობიუროკრატია კლასიკური საბჭოთა მეთოდებით მოქმედებს.

„ფაქტია, რომ დღეს კლასიკური საბჭოთა მეთოდებით მოქმედებენ, მათ შორის ძალიან ღრმა წარსულის მქონე პოლიტიკოსები, მაგალითად ქალბატონი რასა. წლებია თავდასხმის ქვეშ ვართ, დღეს ესაუბრებიან მილიონ ასიათასამდე ქართველ ამომრჩეველს, რომელმაც ადგილობრივ არჩევნებზე გაიმეორა საპარლამენტო არჩევნების შედგები ამ თავდასხმების ფონზე“, - აღნიშნა ირაკლი კირცხალიამ.