ირაკლი კირცხალია საიას ანგარიშზე: სად მაშინდელი ციხე და სად დღევანდელი, ზოგი მაცივრით რომ გამორბის და ზოგი ტელევიზორით, ის ჰუმანური მიდგომები, რაც არის პენიტენციურ სისტემაში, ამას ანგრევენ. იმ შედეგზე უნდათ ჩრდილის მიყენება, რომელსაც დღეს მივაღწიეთ

ფრაქცია „ქართული ოცნების“ თავმჯდომარე ირაკლი კირცხალია გადაცემაში „ღამის კურიერი“ „საქართველოს ახალგაზრდა იურისტთა ასოციაციის“ მიერ გაეროს სპეციალური მომხსენებლისთვის გაგზავნილ ანგარიშს გამოეხმაურა, რომელიც ციხის პოპულაციის ზრდას ეხება.

კირცხალიას შეფასებით, საიას ანგარიში ქვეყნის და პენიტენციური სისტემის წინააღმდეგ მიმართული მორიგი ცრუ დასმენაა.

„ცრუ დასმენა ყოველთვის გაგრძელდება. სწორედ სად მაშინდელი ციხე და სად დღევანდელი ციხე რომ არის, აი სწორედ მაგიტომ მიდის აი ამ ყველაფერზე მიზანმიმართული შეტევა. სწორედ ის მდგომარეობა, რა მდგომარეობაც არის დღეს პენიტენციურ სისტემაში, ზოგი მაცივრით რომ გამორბის და ზოგი ტელევიზორით, ყველამ ვნახეთ ის კადრები და თურმე ვიღაც ფეხბურთს ვერ უყურებს და თურმე სადღაც რამდენიმე დღით რომელიღაც წვენს შეიძლება დააგვიანდა და ასეთი პრეტენზიები რომ აქვთ ციხეებში, სადაც მიცვალებულებს აბამდნენ საკნებში და წამებით 10 კაციან საკანში კარანტინში 70 და 80 კაცი რომ იდგა, ესენი მიდიან დღეს იმ ე.წ. „დანოსებით“. ამას ურტყამენ. ამას ურტყამენ იმას, რაც ჩვენ ვაშენეთ და 2012 წელს რაც მოვიდა [ქართული ოცნება] მთავარი ღირებულება იყო ადამიანი და მისი უფლებები. აი ამას ურტყამენ. სწორედ მაგიტომ ვიტყვი და ხაზგასმით ვიტყვი, რომ სწორედ დღეს ის ჰუმანური მიდგომები და ის სტანდარტები, რაც არის პენიტენციურ სისტემაში და რასაც ხელმძღვანელობს დღეს იუსტიციის მინისტრი და ყველა ის დეპარტამენტი, რომელიც პასუხისმგებელია და რასაც ხელმძღვანელობდა ყველა იუსტიციის მინისტრი, რომელიც იყო ჩვენი მმართველობის პერიოდში, აი ამას ანგრევენ ზუსტად. იმ ნაშენების დანგრევა უნდათ და იმ შედეგზე ჩრდილის მიყენება უნდათ, რა შედეგზეც დღეს ჩვენ ვართ გასულები“, - აღნიშნა კირცხალიამ.

მისივე განცხადებით, ეს ყველაფერი მათი ანტისახელმწიფოებრივი კამპანიის გაგრძელებაა.

„ესეც გაგრძელებაა იმ ანტისახელმწიფოებრივი და იმ არასამთავრობო აგენტური კოალიციის წარმომადგენლების, რომლებიც დღეს ჩაბოდიალდნენ ევროპის რომელიმე ქვეყანაში და ჩაიტანეს ცრუ [ანგარიში]. აი ეს თუ ვინმემ სერიოზულად მიიღო ისე, როდესაც იცის რეალურად აქ რა ხდება, ეს პასუხებიც წინასწარ ხომ ვერ ვიტყვი რა არის, ხომ? ბევრი პასუხი მოგვისმენია ასეთ ჩასვლაზე და ბევრი კომენტარი მოგვისმენია, თუნდაც ზურაბიშვილების, ხიდაშელის, საბანაძის და ასე შემდეგ სხვადასხვა ქვეყნის ინტერესის გამტარებელი აგენტების მონაბოდი რომელიღაც მოღალატეობრივი ტრიბუნიდან გაურკვეველი სახელი და გვარების წინაშე, თავისი ქვეყნის წინააღმდეგ და შემდეგ აქ მათივე ტელევიზიებიდან ამითი დღის წესრიგის შექმნა თვიდან თვემდე თუ კვირიდან კვირამდე. ამის გაგრძელებაა“, - განაცხადა ირაკლი კირცხალიამ.