ირაკლი ქადაგიშვილი: 2025 წელს, საქართველოს მეღვინეობის დარგმა, დაახლოებით 560 მილიონი დოლარის პროდუქცია აწარმოა და გაიტანა უცხოეთში - ჩვენი მეღვინეობა მსოფლიო კონკურენციას უნდა უძლებდეს

იმისათვის, რომ სოფლის მეურნეობა წარმატებული იყოს, აუცილებელი პირობაა მსხვილი მიწის ფართობები. იმიტომ, რომ იქ ყველა პროცესი გაცილებით მომგებიანია, - განაცხადა რეგიონული პოლიტიკისა და თვითმმართველობის საპარლამენტო კომიტეტის თავმჯდომარემ, ირაკლი ქადაგიშვილმა გადაცემაში „ღია ეთერი“.

„როდესაც საუბარია მცირე ვენახზე, რომელიც ერთ ჰექტარს არ ცდება, ეს დამოუკიდებელ პირობებში ოჯახისათვის ვერ გახდება ეკონომიკურად კმარი.

ყურძენიც, ვენახიც, ოჯახიც, ერთი მტკაველი გოჯი მიწაც კი ყველაზე დიდი ქონება და ყველაზე დიდი ბმა არის შენს სამშობლოსთან, ეს რომ არ დარჩეს მხოლოდ ბაზრის ანაბარა, ამიტომ შემოდის სახელმწიფო ამ პროცესში.

რა თქმა უნდა, ხდება არასწორი კულტივაცია ვენახისა ან სხვა კულტურებისა, რომელიც საბოლოო ჯამში ვაზს აზიანებს. ამიტომ, სახელმწიფო ამ დიფერენციაციასაც იმიტომ აკეთებს, რომ მომავალ წელს, 16-გრადუსიანი ყბადაღებული ყურძენი ახლა თუ [მოსავლის] 0,5%-ია, 000,5% გახდეს და ის მევენახე, მცირე მიწაზე მოყვანილი ვენახიდან, საბოლოო ჯამში უფრო კარგ ნაყოფს მიიღებს, მათ შორის ფინანსური თვალსაზრისით.

ჩვენი მეღვინეობა მსოფლიო კონკურენციას უნდა უძლებდეს. 2025 წელს, საქართველოს მეღვინეობის დარგმა, დაახლოებით 560 მილიონი დოლარის პროდუქცია აწარმოა და გაიტანა უცხოეთში“, - აღნიშნა ქადაგიშვილმა.