ირაკლი ქადაგიშვილი ახვლედიანის ორგანიზებულ სემინარზე: ნათელია, რომ ასეთი ტიპის დაფინანსება ემსახურება რადიკალური ოპოზიციისა და რადიკალური დღის წესრიგის წახალისებას

ნათელია, რომ ასეთი ტიპის დაფინანსება ემსახურება რადიკალური ოპოზიციისა და რადიკალური დღის წესრიგის წახალისებას, - განაცხადა რეგიონული პოლიტიკისა და თვითმმართველობის საპარლამენტო კომიტეტის თავმჯდომარემ, ირაკლი ქადაგიშვილმა.

დეპუტატმა კომენტარი გააკეთა ბახმაროში გამართული შეხვედრის შესახებ, რომელიც ევროპის საბჭოს მხარდაჭერით, არმაზ ახვლედიანის ორგანიზებით გაიმართა.

„არმაზ ახვლედიანი როცა სჭირდებათ პოლიტიკოსია და როცა სჭირდებათ არასამთავრობო ორგანიზაციაა. ეს ადამიანი ნაციონალური მოძრაობის სხვადასხვა შტოდან იყრიდა კენჭს, ხდებოდა კიდეც დეპუტატი მაგრამ არ აღიარებდნენ არჩევნებს ყოველ ჯერზე. აქედან გამომდინარე, საუბარია ასეთი ტიპის რადიკალური დღის წესრიგის გამტარებელი ადამიანებისა და დღის წესრიგის დაფინანსებაზე. უფრო მეტი კონკრეტიკა, მოკვლევის შემდეგ იქნება ცნობილი“, - აღნიშნა ქადაგიშვილმა.

ცნობისთვის, ბახმაროში გამართულ სემინარს, რომელიც ევროსაბჭოს მხარდაჭერით გაიმართა, აუდიტის სამსახური შეისწავლის.