ირაკლი ქადაგიშვილი სააკაშვილზე: მისი დამოკიდებულება დღევანდელი პროცესის მიმართ არის სწორედ რადიკალური. მან ისიც იცის, რომ ამ ოპოზიციით დალაგებულ ვითარებაში არჩევნებს ვერ მოიგებს, ამიტომ მუდამ რევოლუციაზე აპელირებს
მისი დამოკიდებულება დღევანდელი პროცესის მიმართ არის სწორედ რადიკალური. მან ისიც იცის, რომ ამ ოპოზიციით დალაგებულ ვითარებაში არჩევნებს ვერ მოიგებს, ამიტომ მუდამ რევოლუციაზე აპელირებს, - განაცხადა გადაცემაში „იმედი LIVE“ რეგიონული პოლიტიკისა და თვითმმართველობის საპარლამენტო კომიტეტის თავმჯდომარემ ირაკლი ქადაგიშვილმა მიხეილ სააკაშვილის განცხადებების შეფასებისას.
მისივე თქმით, სააკაშვილის პოლიტიკური ბრძოლის გამოცდილება სწორედ რევოლუციას ეყრდნობა. ქადაგიშვილი მიიჩნევს, რომ 2003 წელს არა არჩევნების გზით ხელისუფლების ცვლილებისთვის ნოყიერი ნიადაგი იყო. შემდგომი არჩევნები კი მისი მხრიდან რეპრესიული იყო და იგი ზეწოლას ახდენდა. ამის მაგალითად მან იმ პერიოდში ჩატარებული საპრეზიდენტო არჩევნები დაასახელა.
„ამდენად, მისი დამოკიდებულება დღევანდელი პროცესის მიმართ არის სწორედ ასეთი რადიკალური. მან ისიც იცის, რომ ამ ოპოზიციით დალაგებულ ვითარებაში არჩევნებს ვერ მოიგებს. ამიტომ მუდამ აპელირებს იმაზე, რომ რევოლუცია, რევოლუცია, რევოლუცია... ამით მას უნდა, რომ თავისი თავი, როგორც ლიდერი წარმოაჩინოს და მეორე მხრივ, რეალურადაც ხედავს, რომ ამ ოპოზიციას დღეს არჩევნებით გამარჯვების არანაირი შანსი არ აქვს“, - განაცხადა ქადაგიშვილმა.
მისივე თქმით, ოპოზიციას აქვს დაშვებული ისეთი შეცდომა, რომლის ახსნა შეუძლებელია. ამის მაგალითად კი მან 2024 წლის ოქტომბრის არჩევნების შედეგები დაასახელა, რომელიც ოპოზიციისთვის სერიოზული იყო, თუმცა ოპოზიციამ შიდა თუ გარე კარნახით ეს შედეგები გაანიავა.
„დღეს კი პოლიტიკური უდაბნოში, რომელიც თვითონვე შექმნეს, აქეთ-იქეთ იხედებიან და არ იციან, რა ქნან“, - აღნიშნა ქადაგიშვილმა.
იმედი
წყარო: imedinews.ge