ირაკლი ზარქუა ონისე ოქრიაშვილზე: ყველას მოვუწოდებ, ერთი მხრივ, მაქსიმალურად სიტყვით, ურთიერთდანდობით იყოს ურთიერთობები გარკვეული და მეორე მხრივ, არ შეიძლება, იმ ადამიანების უდიერად მოხსენიება, რომლებიც საამაყოა ნებისმიერი ქართველისთვის

არ არის ლამაზი, მძიმეა და ბუნებრივია, მიუღებელია ძალადობა, რაც არ უნდა ფაქტორით იყოს ეს განსაზღვრული, - განუცხადა პარლამენტში ჟურნალისტებს დიასპორის საკითხთა საპარლამენტო კომიტეტის თავმჯდომარემ, ირაკლი ზარქუამ ონისე ოქრიაშვილის მიმართ განხორციელებულ თავდასხმაზე საუბრისას.

„კიდევ ერთხელ, ყველას მოვუწოდებ, ერთი მხრივ, მაქსიმალურად სიტყვით, ურთიერთდანდობით იყოს ეს ურთიერთობები გარკვეული და მეორე მხრივ, ყველას მოვუწოდებ, არ შეიძლება, იმ ადამიანების უდიერად მოხსენიება, რომლებიც საამაყოა ნებისმიერი ქართველისთვის. ეს იქნებიან მწერლები, საზოგადო მოღვაწეები, პოეტები, თუ არ აქვს მნიშვნელობა, არ შეიძლება უდიერად მოხსენიება! არ შეიძლება, შეურაცხყოფის მიყენება! არ შეიძლება ლანძღვა-გინება, რასაც ჩვენ ვისმენთ“, - განაცხადა ზარქუამ.

ონისე ოქრიაშვილი მასზე თავდასხმასთან დაკავშირებით პოლიციაში გამოიკითხა. უწყებაში გამოცხადდა და გამოიკითხა მასზე თავდამსხმელიც.

ოპოზიციის აქტივისტ ონისე ოქრიაშვილს, რომელიც ერთ-ერთ პოდკასტში მწერალ ნოდარ დუმბაძის მისამართით სიძულვილის ენას იყენებს, ფიზიკურად გაუსწორდნენ.