ისლამური სახელმწიფოს სამ დაკავებულ მებრძოლს ბრალი ოფიციალურად დღეს წარედგინებათ

ისლამური სახელმწიფოს სამ დაკავებულ მებრძოლს ბრალი ოფიციალურად დღეს წარედგინებათ, რის შემდეგაც სასამართლო მათთვის აღმკვეთის ღონისძიების შეფარდებაზე იმსჯელებს.

საქართველოს სამი მოქალაქე სახელმწიფო უსაფრთხოების სამსახურმა უცხო ქვეყნის ტერორისტულ ორგანიზაციაში გაერთიანებისა და ტერორისტულ საქმიანობაში დახმარების ბრალდებით დააკავა. სპეცოპერაცია პანკისის ხეობის სოფლებში – ომალოში, ბირკიანსა და ჯოყოლოში ჩატარდა.

„აისისის“ რიგებში გაწევრებული საქართველოს მოქალაქეები უცხო ქვეყნიდან, ტერორისტული ორგანიზაციის ლიდერებისგან მითითებებს იღებდნენ. ქრონიკამ გაარკვია, რომ დაკავებულებს შორის არიან ისინი, ვინც სირიაში „აისისის“ დავალებებს პირადად ასრულებდნენ.

მოპოვებული ფოტო მასალით ინფორმაცია დასტურდება. გაირკვა, რომ დაკავებულები პანკისის ხეობაში თანამოაზრეებს კონსპირაციულად ეძებდნენ და გადაბირებას ცდილობდნენ. „აისისის“ დაკავებული მებრძოლების სახლებიდან ამოღებულია ცეცხლსასროლი იარაღი, ვაზნები, ხელყუმბარები, ასაფეთქებელი ნივთიერება და ტერორისტული ორგანიზაციის სიმბოლიკის მქონე ნივთები - მათ შორის დროშა.