ისრაელის ოპოზიციის ლიდერი: ამერიკის პრეზიდენტი ღიად და საჯაროდ ეუბნება ისრაელის პრემიერ-მინისტრს - „შენი უფროსი მე ვარ და გააკეთებ იმას, რასაც გეტყვიან“

პრემიერ-მინისტრმა ბენიამინ ნეთანიაჰუმ ომი წააგო და გადამწყვეტ მომენტში გატყდა, - აცხადებს ისრაელის ოპოზიციის ლიდერი, იაირ ლაპიდი, რომელიც ვაშინგტონსა და თეირანს შორის დაგეგმილ ცეცხლის შეწყვეტის შეთანხმებას აკრიტიკებს.

„ისრაელის სახელმწიფომ ბრძოლა მოიგო, ნეთანიაჰუმ კი ომი წააგო. ისრაელის თავდაცვითმა ძალებმა თავისი მისია შეასრულეს, ნეთანიაჰუმ კი საკუთარი საქმე ვერ შეასრულა“, - განაცხადა ლაპიდმა ჟურნალისტებთან საუბრისას.

„ირანის ფრონტზე ნეთანიაჰუს დიპლომატიურ მარცხზე უფრო აბსოლუტური კრახი ისტორიას არ ახსოვს. დადგა დრო, თვალი გავუსწოროთ რეალობას - ნეთანიაჰუს ამის გაკეთება უბრალოდ აღარ შეუძლია“, - განაგრძო ლაპიდმა და უკმაყოფილება გამოთქვა იმის გამო, რომ „ამერიკის პრეზიდენტი ღიად და საჯაროდ ეუბნება ისრაელის პრემიერ-მინისტრს: „შენი უფროსი მე ვარ და გააკეთებ იმას, რასაც გეტყვიან“.

„ეს ისრაელს აყენებს მძიმე ვითარებაში, როდესაც მას უწევს არჩევანი გააკეთოს საკუთარ თავდაცვის უფლებასა და მის უმთავრეს მოკავშირესთან დაპირისპირებას შორის“, - დასძენს ის და ამტკიცებს, რომ ბენეტ-ლაპიდის მთავრობის პირობებში „ჩვენ ამ სიტუაციაში თავიდანვე არ აღმოვჩნდებოდით“.