ისრაელის საელჩო საქართველოში და ელჩი, ვალიდ აბუ ჰაია, შიო III-ს სრულიად საქართველოს კათოლიკოს-პატრიარქად გამორჩევას ულოცავენ

ისრაელის საელჩო საქართველოში და ელჩი, ვალიდ აბუ ჰაია, შიო III-ს სრულიად საქართველოს კათოლიკოს-პატრიარქად გამორჩევას ულოცავენ.

როგორც საელჩოს ფეისბუქ გვერდზეა აღნიშნული, მის უწმინდესობასა და უნეტარესობას უსურვებენ სიბრძნეს, სიმტკიცეს, მშვიდობასა და ნაყოფიერ მსახურებას.

„ისრაელის საელჩო საქართველოში და ელჩი, ვალიდ აბუ ჰაია გულითადად ულოცავს მის უწმინდესობასა და უნეტარესობას, სრულიად საქართველოს კათოლიკოს-პატრიარქს, მცხეთა-თბილისის მთავარეპისკოპოსს, ბიჭვინთისა და ცხუმ-აფხაზეთის მიტროპოლიტს, შიო III-ს, სრულიად საქართველოს კათოლიკოს-პატრიარქად გამორჩევას.

ქართველი ხალხისა და საქართველოს მართლმადიდებელი ეკლესიისთვის ამ მნიშვნელოვან და ისტორიულ მომენტში, მის უწმინდესობასა და უნეტარესობას ვუსურვებთ სიბრძნეს, სიმტკიცეს, მშვიდობასა და ნაყოფიერ მსახურებას საქართველოს მართლმადიდებელი ეკლესიისა და მისი მრევლის წინამძღოლობაში, რწმენით, თანაგრძნობითა და ერთობით.

ისრაელისა და საქართველოს ხალხებს შორის ურთიერთობა საუკუნოვან მეგობრობას, ურთიერთპატივისცემასა და საერთო სულიერ მემკვიდრეობას ეფუძნება. ქართველები და ებრაელები თაობების განმავლობაში ცხოვრობდნენ ერთმანეთის გვერდით - ღრმა ისტორიული კავშირებით, კულტურული ურთიერთგაგებითა და მტკიცე მეგობრობით.

დარწმუნებული ვართ, რომ ჩვენს ერებსა და ხალხებს შორის არსებული განსაკუთრებული ურთიერთობები კიდევ უფრო გაღრმავდება მშვიდობის, ტოლერანტობისა და ადამიანის ღირსების ღირებულებებზე დაყრდნობით.

ვულოცავთ მის უწმინდესობასა და უნეტარესობას შიო III-ს, საქართველოს მართლმადიდებელ ეკლესიასა და ქართველ ხალხს“, - აღნიშნულია მისალოც წერილში.