იუსტიციის მინისტრმა პაატა სალიამ თბილისში აღმასრულებელთა საერთაშორისო კონფერენცია გახსნა

იუსტიციის მინისტრმა პაატა სალიამ თბილისში აღმასრულებელთა საერთაშორისო კონფერენცია გახსნა. ინფორმაციას იუსტიციის სამინისტრო ავრცელებს.

ღონისძიება იუსტიციის სამინისტროს, აღსრულების ეროვნული ბიუროსა და აღმასრულებელთა საერთაშორისო კავშირის (UIHJ) ორგანიზებით იმართება და მას 30-ზე მეტი ქვეყნის 100-ზე მეტი დელეგატი და საერთაშორისო ექსპერტი ესწრება.

,,ჩვენი სტუმრები არიან აღმასრულებელთა საერთაშორისო კავშირის, ევროპის კავშირის წარმომადგენლები. მსოფლიოს სხვადასხვა ქვეყნებიდან, ევროპიდან, ამერიკიდან, აზიიდან ჩამოსულები არიან ხელმძღვანელი პირები, საერთაშორისო ექსპერტები. ღონისძიებაზე საუბარი იქნება იმ თანამედროვე მიღწევებზე, გამოწვევებზე, რომელიც დღეს კანონის აღსრულების წინაშე დგას. საუბარი გვექნება იმ ინოვაციებზე, რომელიც დანერგილია, როგორც საქართველოში, ისე მსოფლიოში.

ერთმანეთს გავუზიარებთ გამოცდილებას. კონფერენცია ძალიან ნაყოფიერი იქნება ყველა მონაწილესთვის იმ კუთხითაც, რომ ჩვენ მომავალში უფრო ახალი ხედვები განვავითაროთ. კერძოდ ის მიმართულება, რომ დღეს აღმასრულებელი არ უნდა იყოს მხოლოდ სასამართლო გადაწყვეტილების იძულებით აღსრულების მექანიზმი. აღმასრულებელი დღეს უკვე იძენს სოციალურ ფუნქციასაც. ჩვენთან უკვე აქტიურად დაინერგა მორიგების მექანიზმი, არიან ჩართულები სოციალური მუშაკები. მაქსიმალურად ვცდილობთ ჰუმანური გავხადოთ აღსრულების პროცესი საქართველოში. ასევე, ვაპირებთ კონფერენციის მონაწილეებს გავუზიარიათ აღსრულების პროცესში თანემედროვე ტექნოლოგიების გამოყენების გამოცდილებაც“, - განაცხადა პაატა სალიამ.