ჯეი დი ვენსი: აშშ მოუწოდებს პაკისტანსა და კატარს, ურთიერთგაგების მემორანდუმის ტექსტის გასაჯაროების ნება დართონ

აშშ-ის ვიცე-პრეზიდენტმა, ჯეი დი ვენსმა განაცხადა, რომ აშშ მოუწოდებს პაკისტანსა და კატარს, ურთიერთგაგების მემორანდუმის ტექსტის გასაჯაროების ნება დართონ.

„მათ გვთხოვეს, ტექსტი ცოტა ხნით არ გაგვესაჯაროებინა. ის, ყველაზე გვიან, პარასკევს მაინც გამოქვეყნდება. ჩვენ რეალურად ვცდილობთ ვუბიძგოთ მათ, რომ დღესვე გამოაქვეყნონ, რადგან გვინდა ამერიკელ ხალხს ვუთხრათ, რომ ეს არსებითად კარგი გარიგებაა ამერიკელი ხალხისთვის“, - განუცხადა ვენსმა CBS-ს.

ვენსის თქმით, ტექსტი აქამდე იმიტომ არ გამოქვეყნებულა, რომ კატარელებმა და პაკისტანელებმა შეერთებულ შტატებს დაცდა სთხოვეს გარკვეული „დიპლომატიური პროტოკოლების“ გამო, რაზეც ვენსმა დასძინა, რომ თავად ეს პროტოკოლები „ბოლომდე არ ესმის“.