ჯეი დი ვენსი: ჩვენი მოლოდინია, რომ გრძელვადიან პერსპექტივაში სრუტე უფასო ტრანზიტისთვის გაიხსნება და სწორედ ამ ტიპის საკითხებს გადავწყვეტთ ტექნიკურ მოლაპარაკებებზე

აშშ-ის ვიცე-პრეზიდენტმა, ჯეი დი ვენსმა განაცხადა, რომ ჰორმუზის სრუტის მუდმივად, ყოველგვარი გადასახადის გარეშე ხელახალი გახსნის საკითხი შემდგომ „ტექნიკურ მოლაპარაკებებზე“ განიხილება, რაც იმაზე მიანიშნებს, რომ ეს თემა ჯერ კიდევ ბოლომდე მოგვარებული არ არის.

„ჩვენი მოლოდინია, რომ გრძელვადიან პერსპექტივაში სრუტე უფასო ტრანზიტისთვის გაიხსნება და სწორედ ამ ტიპის საკითხებს გადავწყვეტთ ამ ტექნიკურ მოლაპარაკებებზე“, - განუცხადა ვენსმა CNBC-ის.

„კიდევ ბევრი ძალიან მნიშვნელოვანი დეტალია გასარკვევი, რის გამოც რეალურად დავსხდებით მაგიდასთან, ერთად ვიმსჯელებთ და ამ დეტალებზე წინსვლის გზას გამოვნახავთ“, - აღნიშნა მან.

CNN-ის ინფორმაციით, ირანთან დაკავშირებული საინფორმაციო სააგენტოები მიანიშნებენ, რომ ქვეყანა დათანხმდა სრუტეში თავისუფალ ტრანზიტს 60 დღის განმავლობაში, თუმცა ამ ვადის გასვლის შემდეგ გადასახადის აღდგენას გეგმავს.

ვენსის თქმით, ირანისთვის მსოფლიო ეკონომიკაში დაბრუნების შეთავაზება ამ შეთანხმების ფარგლებში „ზემოქმედების ბერკეტია“, რაც თეირანისთვის სტიმული იქნება, რათა შეასრულოს თავისი ვალდებულება ბირთვული იარაღის არშეძენისა თუ არგამომუშავების შესახებ.

„ჩვენ ირანელებს ვეუბნებით: თქვენ შეგიძლიათ გქონდეთ წვდომა სანქციებისგან თავისუფალ ეკონომიკაზე, შეგიძლიათ კვლავ ჩაერთოთ მსოფლიო ეკონომიკაში, მაგრამ მხოლოდ იმ შემთხვევაში, თუ შეასრულებთ ამ შეთანხმებით ნაკისრ ვალდებულებებს. ასე რომ, ეს არის ბერკეტი და, ამავდროულად, მათი ბირთვული პროგრამის კონტროლის მექანიზმი, რომელიც ჩვენ ხელთ გვაქვს“, - განაცხადა ვენსმა.

„არჩევანი, რომელიც ირანელებმა უნდა გააკეთონ, შემდეგია: სურთ თუ არა მათ მსოფლიო ეკონომიკაზე წვდომა? თუ კი, მაშინ მათ მოუწევთ უარი თქვან თავიანთ გრძელვადიან ბირთვულ ამბიციებზე“, - დასძინა მან.