ჯორჯია მელონიმ ბოლონიაში პოლიციის მიერ დაკავებისას მაროკოელი ბიზნესმენის დაღუპვის გამოძიება მოითხოვა და პოლიციის საწინააღმდეგო პროტესტზე ძალადობა დაგმო

იტალიის ქალაქ ბოლონიაში საპროტესტო აქცია პოლიციასა და დემონსტრანტებს შორის შეტაკებებით დასრულდა. დემონსტრანტები ქუჩაში პოლიციის მიერ დაკავებისას მაროკოელი ბიზნესმენის დაღუპვას აპროტესტებდნენ.

არეულობა მას შემდეგ დაიწყო, რაც აქტივისტებმა პოლიციის მიმართულებით ქვების, მაშხალებისა და სხვადასხვა საგნის სროლა დაიწყეს. დაშავდა სამოცამდე პოლიციელი. არეულობა რამდენიმე საათს გაგრძელდა, პოლიციამ აქტივისტები ცრემლსადენი გაზისა და წყლის ჭავლის გამოყენებით დაშალა.

იტალიის პრემიერ-მინისტრი ჯორჯია მელონი მომხდართან დაკავშირებით სრული გამოძიების მოწოდებით გამოვიდა და ამავდროულად დაგმო პოლიციის საწინააღმდეგო საპროტესტო აქციები, რომლებიც ძალადობაში გადაიზარდა.

„უაღრესად მნიშვნელოვანია, რომ პასუხისმგებლობა მაქსიმალური გულდასმით დადგინდეს. სიმართლე უნდა გაირკვეს, ყოველგვარი მიკერძოებისა და დანდობის გარეშე. ისინი კი, ვინც გადაწყვიტა ეს ინციდენტი ქალაქის დარბევის, სამართალდამცველებზე თავდასხმისა და ძალადობის გავრცელების საბაბად გამოეყენებინა... სიმართლეს კი არა, კონფლიქტს ეძებდნენ“, - მიიჩნევს მელონი.