კახეთის მხარეში სახელმწიფო რწმუნებული თელავში სტიქიაზე: სამაშველო სამსახურები, ყველა შესაბამისი უწყება მობილიზებულია და როგორც კი მდინარის დონე დაიკლებს, მოცემულობის შეფასებას და სალიკვიდაციო სამუშაოებს დავიწყებთ

წუხელ მოსულმა უხვმა ნალექმა ქალაქ თელავში ხევები აადიდა, განსაკუთრებული მნიშვნელობა ჰქონდა თელავის ხევის ადიდებას, რომელმაც სეხნიაშვილის ქუჩის მიმდებარედ ჩახერგა ხიდი და მდინარემ კალაპოტიდან გადმოსვლა დაიწყო, - განაცხადა კახეთის მხარეში სახელმწიფო რწმუნებულმა პლატონ კალმახელიძემ.

მისი ინფორმაციით, შესაბამისი ტერიტორიებიდან მოსახლეობის ევაკუაცია განხორციელდა

„შესაბამისი ობიექტებიდან დავიწყეთ მოსახლეობის ევაკუაცია. შემდეგ შეიქმნა კიდევ დამატებითი საფრთხის საშიშროება აგრარული ბაზრის მიმდებარედ, იქაც დავიწყეთ მოქალაქეების ევაკუაცია. უსაფრთხოების მიზნით გზაჯვარედინები დაკეტილია. სამაშველო სამსახურები, ყველა შესაბამისი უწყება მობილიზებულია და როგორც კი მდინარის დონე დაიკლებს, მოცემულობის შეფასებას და სალიკვიდაციო სამუშაოებს დავიწყებთ“, - განაცხადა სახელმწიფო რწმუნებულმა.

სტიქიამ თელავში პრობლემები შექმნა.