კანადამ მსოფლიო ჩემპიონატების ისტორიაში პირველი ქულა მოიპოვა

აშშ-ში, კანადასა და მექსიკაში მიმდინარე მსოფლიო ჩემპიონატის ჯგუფური ეტაპის პირველ ტურში, კანადის ეროვნული ნაკრები ბოსნია-ჰერცეგოვინას დაუპირისპირდა. ტორონტოში გამართული B ჯგუფის შეხვედრა ანგარიშით 1:1 დასრულდა.

შეხვედრის 21-ე წუთზე ანგარიში ბოსნიელებმა გახსნეს. გოლი იოვო ლუკიჩმა გაიტანა, რომლისთვისაც ეს სადებიუტო ბურთი აღმოჩნდა ნაკრებში ჩატარებულ ოთხ მატჩში. მასპინძლებმა წონასწორობის აღდგენა თამაშის მიწურულს, 78-ე წუთზე შეძლეს. თავი კაილ ლარინმა გამოიჩინა, რომელმაც მოედანზე შეცვლაზე შესვლის შემდეგ, ბურთთან პირველივე შეხებით შეძლო მეტოქის კარის აღება.

ეს არის კანადის ნაკრების მიერ მსოფლიო ჩემპიონატების ისტორიაში მოპოვებული პირველი ქულა. აქამდე კანადელებმა 1986 და 2022 წლების მუნდიალებზე იასპარეზეს, სადაც გამართული ექვსივე მატჩი წაგებით დაასრულეს.

მომდევნო ტურის შეხვედრები 18 ივნისს გაიმართება. კანადის ნაკრები ვანკუვერში კატარს უმასპინძლებს, ხოლო ბოსნია-ჰერცეგოვინა აშშ-ის ქალაქ ინგლვუდში შვეიცარიის ნაკრებს დაუპირისპირდება.

2026 წლის მსოფლიო ჩემპიონატი ისტორიული ფაქტითაა გამორჩეული - ტურნირი პირველად ტარდება 48 ეროვნული ნაკრების მონაწილეობით და მას ერთდროულად სამი ქვეყანა მასპინძლობს. მსოფლიო ჩემპიონატი 19 ივლისს დასრულდება.