კიმ ჩენ ინმა სამხრეთ კორეის საზღვართან ჯარების გაძლიერების ბრძანება გასცა
ჩრდილოეთ კორეის ლიდერმა კიმ ჩენ ინმა განაცხადა, რომ სამხრეთ კორეის საზღვარზე არსებული ფრონტისპირა და ძირითადი ქვედანაყოფების გაძლიერების გეგმებს „ომის უფრო ეფექტური შეკავებისთვის“ გადამწყვეტი მნიშვნელობა აქვს.
კიმ ჩენ ინმა ჯარების გაძლიერების მოთხოვნა კვირას, 17 მაისს, არმიის დივიზიებისა და ბრიგადების მეთაურებთან გამართულ თათბირზე გააჟღერა. მან მოუწოდა მომზადების სისტემის კორექტირებისა და პრაქტიკული სწავლებების გაფართოებისკენ, რათა ისინი შეესაბამებოდეს ომის წარმოების თანამედროვე პირობებსა და ჩრდილოეთ კორეის შეიარაღებული ძალების განვითარებას.
ჩრდილოეთ კორეის ლიდერის თქმით, დაგეგმილმა პროექტებმა უნდა გადახედოს ოპერატიულ კონცეფციებს სამხედრო-ტექნიკური აღჭურვილობის სწრაფი მოდერნიზაციის შესაბამისად.
განსაკუთრებული ყურადღება კიმმა დაუთმო იდეოლოგიურ ერთგულებასა და სიფხიზლეს სამხრეთ კორეის მიმართ, რომელსაც მან „დაუძინებელი მტერი“ უწოდა.
ორი კორეა ტექნიკურად კვლავ ომის მდგომარეობაშია, რადგან მათ შორის 1950-53 წლების კონფლიქტი არა სამშვიდობო ხელშეკრულებით, არამედ საზავო შეთანხმებით დასრულდა.
იმედი
წყარო: imedinews.ge