კომიტეტების ერთობლივ სხდომაზე საქართველოს 2026 წლის სახელმწიფო ბიუჯეტის შესრულების 3 თვის მიმოხილვა მოისმინეს

ეკონომიკური პოლიტიკის და გარემოს დაცვისა და ბუნებრივი რესურსების კომიტეტების ერთობლივ სხდომაზე საქართველოს 2026 წლის სახელმწიფო ბიუჯეტის შესრულების 3 თვის მიმოხილვა მოისმინეს.

მომხსენებელმა, ფინანსთა მინისტრის პირველმა მოადგილემ გიორგი კაკაურიძემ კომიტეტის წევრებს 2026 წლის იანვარ-მარტის ძირითადი მაკროეკონომიკური პარამეტრები გააცნო და სახელმწიფო ბიუჯეტის ასიგნებების შესრულებაზე გაამახვილა ყურადღება.

მისი თქმით, 2026 წლის I კვარტალში ეკონომიკისა და მდგრადი განვითარების სამინისტროს 99 მილიონ ლარზე მეტი აქვს ათვისებული, ხოლო გარემოს დაცვისა და სოფლის მეურნეობის სამინისტროს მიერ ათვისებული თანხა 152 მილიონ ლარს შეადგენს.

მომხსენებლის ინფორმაციით, 2026 წლის ბიუჯეტი 5%-იანი ეკონომიკური ზრდის პროგნოზით იყო დაგეგმილი, თუმცა, წლის პირველ კვარტალში ზრდა უფრო მაღალი იყო.

კერძოდ: I კვარტლის საშუალო რეალური ზრდა 9.1%-ია. რეალური მშპ-ის ზრდა იანვარში 7.9%-ია, თებერვალში - 8.8 %, ხოლო მარტში - 10.7%.

რაც შეეხება ინფლაციის მაჩვენებელს, 2026 წლის მარტისთვის წლიური ინფლაცია 4.3%-ია, ხოლო წლიური საშუალო ინფლაციის მაჩვენებელი - 4,4%.

გიორგი კაკაურიძემ საგარეო ვაჭრობისა და ტურიზმის მიმართულებებზე გაამახვილა ყურადღება და აღნიშნა, რომ მიმდინარე წლის პირველ კვარტალში ტურისტული ვიზიტორების რაოდენობამ 997 ათასს გადააჭარბა.

მისივე ინფორმაციით, წლის პირველ კვარტალში საქართველოს უმსხვილესი სავაჭრო პარტნიორი ევროკავშირი იყო, რომლის წილი მთლიან საქონელბრუნვაში 21.4%-ს შეადგენს.

კომიტეტების ერთობლივ სხდომაზე ფინანსთა სამინისტროს მიერ წარმოდგენილი საქართველოს 2026 წლის სახელმწიფო ბიუჯეტის შესრულების 3 თვის მიმოხილვა ცნობად მიიღეს.