„კონსტანტინოვკის დაცემა მხოლოდ დროის საკითხია“ - Reuters-მა ქალაქში არსებულ ვითარებაზე ისაუბრა

რუსეთი თანდათანობით მიიწევს კონსტანტინოვკისკენ, უკრაინის აღმოსავლეთ „ციხესიმაგრეთა სარტყელის“ საკვანძო დასაყრდენი პუნქტისკენ და, ზოგიერთი ანალიტიკოსის აზრით, ქალაქის დაცემა მხოლოდ დროის საკითხია. როგორც Reuters-ი წერს, საბრძოლო მოქმედებები უკვე ქალაქის ფარგლებში მიმდინარეობს - რუსი ჯარისკაცების მცირე ჯგუფები მის გარეუბნებში შეღწევას ცდილობენ.

ანალიტიკოსების თქმით, ქალაქზე თავდასხმა ხაზს უსვამს მოსკოვის უპირატესობას ცოცხალ ძალაში, მიუხედავად იმისა, რომ უკრაინული საშუალო რადიუსის უპილოტო საფრენი აპარატების დარტყმებმა მისი საბრძოლო შესაძლებლობები შეასუსტა.

„[საშუალო რადიუსის დარტყმების] ეფექტი არ ყოფილა იმდენად დიდი, რომ რუსებისთვის შეტევის შეჩერება აეძულებინა. ამიტომ, მიუხედავად იმისა, რომ რუსეთი ზურგში სულ უფრო მძიმე დანაკარგებს განიცდის, მას მაინც შეუძლია შეტევის გაგრძელება, სულ მცირე, გარკვეულ მონაკვეთებზე“, - ამბობს ემილი კასტეხელმი ფინური ანალიტიკური ჯგუფიდან Black Bird-ი.

როგორც Reuters-ი აღნიშნავს, კონსტანტინოვკის აღება რუსულ ძალებს პლაცდარმს შეუქმნის „ციხესიმაგრეთა სარტყელის“ გასწვრივ ჩრდილოეთის მიმართულებით წინსვლისთვის: „თუმცა, ნებისმიერი წინსვლა რუსეთის არმიისთვის, სავარაუდოდ, ხანგრძლივი და სისხლისმღვრელი იქნება და შესაძლოა, გაიმეოროს პოკროვსკისა და ავდეევკის მსგავსი აღმოსავლეთის ქალაქების მძიმე ალყების სცენარი“.

ომის კვლევის ინსტიტუტის ანალიტიკოსები ასევე აღნიშნავენ, რომ მიუხედავად უკრაინისთვის ტაქტიკური ვითარების გაუარესებისა, რუსული ძალების შეჭრა საკმარისი არ არის „სწრაფი ოპერატიული გარღვევისთვის“.

მიუხედავად ამისა, ქალაქის ალყაში მოქცევის რუსული მცდელობები სტაბილურად ზრდის კიევის თავდაცვის ფასს.

„მოგვიწევს არჩევანის გაკეთება: ან ფსონების გაზრდა, ან უკან დახევა. ამჟამად კი სიტუაცია ისეთია, რომ ფსონები ყოველდღიურად იზრდება“, - ამბობს უკრაინელი ანალიტიკოსი, რუსლან მიკულა ჯგუფ DeepState-დან.

ხოლო კასტეხელმი ამტკიცებს, რომ ქალაქის დაცემა „უფრო დროის საკითხია“.

უკრაინის მომარაგების გზები უკვე მუდმივი ზეწოლის ქვეშაა: კონსტანტინოვკის ჩრდილოეთით მიმავალი გზის გასწვრივ ინფრასტრუქტურას არტილერია, უპილოტო საფრენი აპარატები და მართვადი ბომბები ბომბავს, აცხადებენ ამ რაიონში მყოფი სამხედრო მოსამსახურეები.