კვლევა: სტრესის დროს კატებთან ურთიერთობა მდგომარეობას აუარესებს

შინაურ ცხოველთან ურთიერთობას ადამიანის განწყობის ამაღლება მოკლე დროით შეუძლია, თუმცა ის სტრესთან გამკლავებაში არ გვეხმარება. მეტიც, კატებთან კონტაქტმა შესაძლოა სიტუაცია გააუარესოს კიდეც. ნიდერლანდელმა მეცნიერებმა ეს დაადგინეს კვლევის ფარგლებში, რომლის შედეგებიც ჟურნალში Frontiers in Psychology გამოქვეყნდა.

ექსპერიმენტში 188 ადამიანი მონაწილეობდა. 5 დღის განმავლობაში ისინი სპეციალური შეხსენების საფუძველზე ეთამაშებოდნენ ცხოველებს. ძაღლების პატრონებს სტრესის დროს შვება პრაქტიკულად არ უგრძნიათ, კატების მფლობელებმა კი ნეგატიური ემოციების გაძლიერება დააფიქსირეს. მკვლევრები ამ თავისებურებას ცხოველების ქცევას უკავშირებენ.

ძაღლებს, როგორც წესი, პატრონები ფიზიკურ აქტივობასა თუ სოციალურ ინტერაქციაში რთავენ. კატები კი უფრო ხშირად პასიურად იქცევიან და არ საჭიროებენ მუდმივ კონტაქტს - ამით მათ შეუძლიათ ემოციური დაძაბულობის გაძლიერება.

გარდა ამისა, კატებთან ურთიერთობა იწვევს სწრაფ ფიზიოლოგიურ რეაქციებს, მაგალითად, გავლენას ახდენს გულისცემის სიხშირეზე. ეს სტრესულ მოვლენებს ფსიქიკისთვის უფრო შესამჩნევს ხდის.

ნაშრომის ავტორები აღნიშნავენ, რომ კატების მფლობელთა შერჩევის მოცულობა (36 ადამიანი) მნიშვნელოვნად მცირე აღმოჩნდა ძაღლების მფლობელთა ჯგუფზე (75 ადამიანი). სტატისტიკური სიმძლავრის ნაკლებობა საბოლოო დასკვნების გამოტანის საშუალებას არ იძლევა. ცხოველის ინდივიდუალური ხასიათიც დიდ როლს თამაშობს - მოსიყვარულე და ერთგულ კატას შეუძლია დაგამშვიდოთ, მაშინ როდესაც გულგრილი შინაური ცხოველები სევდას უფრო მეტად აძლიერებენ.