ლაშა დარსალია ნაურუს მიერ მიღებულ გადაწყვეტილებაზე: მე ვფიქრობ, რომ ეს არის ისეთი გადაწყვეტილება, რომელიც საქართველოში ყველას უნდა გაუხარდეს და გულდასაწყვეტია, თუ ვინმეს ეწყინა, მიუხედავად იმისა, ვინ სად დგას და რას აკეთებს

მე ვფიქრობ, რომ ეს არის ისეთი გადაწყვეტილება, რომელიც საქართველოში ყველას უნდა გაუხარდეს და გულდასაწყვეტია, თუ ვინმეს ეწყინა, მიუხედავად იმისა, ვინ სად დგას და რას აკეთებს, - განაცხადა „გადაცემაში დღის ქრონიკა“ საქართველოს საგარეო საქმეთა მინისტრის მოადგილემ, ლაშა დარსალიამ ნაურუს მიერ მიღებულ გადაწყვეტილებაზე საუბრისას.

მისივე თქმით, მნიშვნელოვანია ყველა რესურსის და ყველა დახმარების გამოყენება ამ პროცესში.

დარსალიამ მადლობა გადაუხადა ყველა იმ ადამიანს, ვინც დახმარება გაუწია საქართველოს ამ ამოცანების გადაწყვეტაში.

„შესაძლოა არსებობენ ცალკეული აქტორები, ვინც ცდილობენ, რომ სხვა დღის წესრიგი შემოიტანონ აღნიშნულ საკითხში, მაგრამ ჩვენთვის ძალიან მნიშვნელოვანია საერთაშორისო ორგანიზაციების პოზიცია იყოს მყარი ამ საკითხზე. რამდენიმე მნიშვნელოვანი ამოცანაა ამ მიმართულებით, პირველ რიგში ის, რომ ეს არის ოკუპაცია და ოკუპირებული ტერიტორიები. უნდა მოხდეს ამ საკითხის მკაფიოდ დაცემენტება საერთაშორისო დღის წესრიგში, ასევე მნიშვნელოვანია დევნილთა დაბრუნება და ის, რომ ეს არის საქართველოს ოკუპირებული ტერიტორიები, რომელიც დღეს აქვს ოკუპირებული რუსეთის ფედერაციას.

შესაძლოა არსებობს სხვადასხვა მცდელობები აღნიშნული საკითხის მეორე პლანზე წაწევის, მაგრამ ჩვენ გავაგრძელებთ ძალისხმევას, რომ ეს საკითხები მკაფიოდ იდგეს საერთაშორისო ორგანიზაციების დღის წესრიგში“, - აღნიშნა ლაშა დარსალიამ.

ნაურუმ ოკუპირებული აფხაზეთისა და ცხინვალის დამოუკიდებელ სახელმწიფოებად აღიარება უკან წაიღო. დიპლომატიური ურთიერთობების გაუქმების შესახებ გადაწყვეტილება 21 ივლისით თარიღდება.