ლევან მაჭავარიანი: ჩვენ, აშშ-სთან ყველაფერი გაკეთებული გვაქვს, რომ ამ ადმინისტრაციასთან ურთიერთობები რეალური პარტნიორობის ნიშნულიდან დაიწყოს

საპარლამენტო ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა, გადაცემაში „ღია ეთერი-დებატები“, საქართველოსა და ამერიკის ურთიერთობებზე ისაუბრა.

„ჩვენ აშშ-სთან ყველაფერი გაკეთებული გვაქვს, რომ ამ ადმინისტრაციასთან ურთიერთობები დაიწყოს რეალური პარტნიორობის ნიშნულიდან. ჩვენ ღიად ვგულშემატკივრობდით ბატონ დონალდ ტრამპს. რიტორიკა, ჩვენი შეხედულებები, ჩვენი ღირებულებები აბსოლუტურ თანხვედრაშია და იციან, რომ ჩვენ მზად ვართ დავსხდეთ და კონკრეტული გზამკვლევი გავწეროთ დროსა და სივრცეში, სადაც გათვალისწინებული იქნება ორივე მხარის ინტერესები. ძალიან პოზიტიური ნაბიჯებია“, - აღნიშნა მაჭავარიანმა.

მისივე თქმით, ურთიერთობები, რასაც საქართველო შუა აზიის ქვეყნებთან ალაგებს, უმნიშვნელოვანესია.

„შუა აზიის ქვეყნებთან ასეთი მჭიდრო ურთიერთობის გარეშე ეს ყველაფერი შეუძლებელი იქნება. ის, რომ ჩინეთთან ასეთ დონეზეა ჩვენი პარტნიორობა აყვანილი, უმნიშვნელოვანესია, ვინაიდან დღეს ჩინეთი არის ერთ-ერთი ყველაზე მნიშვნელოვანი მოთამაშე. ჩინეთთან ჩვენთვის ასეთი ურთიერთობები კიდევ იმიტომ არის საინტერესო, რომ ჩინეთი, ამხელა ძალა, გვიყურებს, როგორც თანასწორ პარტნიორს“, - აღნიშნა ლევან მაჭავარიანმა.