ლევან მაჭავარიანი: გერმანულმა მხარემ იცის, რომ უსამართლობების მიუხედავად, ჩვენ მზად ვართ ეს ყველაფერი გადავფურცლოთ და აღვადგინოთ ის პარტნიორობა, რაც ყოველთვის გვაკავშირებდა ამ ქვეყანასთან, ამ ხალხთან

გერმანულმა მხარემ იცის, რომ ამ უსამართლობების მიუხედავად, ჩვენ მზად ვართ ეს ყველაფერი გადავფურცლოთ და აღვადგინოთ ის პარტნიორობა, რაც ყოველთვის გვაკავშირებდა ამ ქვეყანასთან, ამ ხალხთან, - აცხადებს ლევან მაჭავარიანი. საპარლამენტო ფრაქცია „ქართული ოცნების“ თავმჯდომარის პირველი მოადგილე თბილისსა და ბერლინს შორის ურთიერთობების დაძაბვაში საქართველოში გერმანიის ყოფილი ელჩის პეტერ ფიშერის როლს უსვამს ხაზს.

„ბატონმა ფიშერმა რა თქმა უნდა მიზანმიმართულად დააზიანა ეს ურთიერთობები. ასეთი დამთხვევა ვერ იქნებოდა, რომ წავიდა ფიშერი და დაიწყო იმ ტყუილების წაშლა ვებგვერდიდან, რაც 1,5 წლის განმავლობაში იდო. თუმცა, მიამიტები არ ვართ და, რა თქმა უნდა, ბატონი ფიშერი დამოუკიდებლად ვერ იმოქმედებდა და ეს ყველაფერი მოდიოდა ცენტრალიზებულად. თუმცა იმ აქტორზეც, ვინც ასრულებს ამ დავალებებს, ბევრი რამ არის დამოკიდებული“, - აცხადებს მაჭავარიანი.

საქართველოს ელჩი გერმანიაში, გერმანიის პრეზიდენტისთვის რწმუნებათა სიგელების გადასაცემად ემზადება. ცერემონია ხვალ გაიმართება. შესაბამისი დოკუმენტების გადაცემას დიპლომატი რამდენიმე თვის განმავლობაში ელოდა. პარალელურად, გერმანიის საგარეო საქმეთა სამინისტროს ვებგვერდიდან წაიშალა ის არასწორი მონაცემები, სადაც საქართველოს მოქმედ პრეზიდენტად სალომე ზურაბიშვილი იყო მოხსენიებული.