ლევან მაჭავარიანი: კარგია მინიმუმ ის, რომ რაღაც ტყუილები წაიშალა გერმანიის მთავრობის ოფიციალური გვერდიდან და სალომე ზურაბიშვილი იქაც აღარ არის უკვე საქართველოს პრეზიდენტი - ვიმედოვნებთ, რომ ეს მხოლოდ პირველი ნაბიჯები იქნება და ისინი შეეცდებიან, გამოასწორონ ის ყველაფერი, რაც ბატონმა ფიშერმა გააფუჭა

კარგია მინიმუმ ის, რომ რაღაც ტყუილები წაიშალა გერმანიის მთავრობის ოფიციალური გვერდიდან და სალომე ზურაბიშვილი იქაც აღარ არის უკვე საქართველოს პრეზიდენტი. ეს უკვე წინ გადადგმული ნაბიჯია, - განაცხადა პარლამენტის ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა.

ის მიიჩნევს, რომ ეს ცვლილებები საქართველოში გერმანიის ყოფილ ელჩთან, პეტერ ფიშერთან გარკვეულწილად კავშირშია.

„ეს ყველაფერი ბატონ ფიშერთან არის კავშირში თუ არა - რა თქმა უნდა, რაღაც კუთხით არის. გვახსოვს, ბატონი ფიშერი როგორ მოგვევლინა რადიკალური ოპოზიციის ერთ-ერთ აქტივისტად. რასაც ახლა გერმანული მხარე აკეთებს, ამას საღ აზრზე დაბრუნება ჰქვია და რა თქმა უნდა, ვიმედოვნებთ, რომ ეს მხოლოდ პირველი ნაბიჯები იქნება და ისინი შეეცდებიან, გამოასწორონ ის ყველაფერი, რაც ბატონმა ფიშერმა გააფუჭა“, - განაცხადა ლევან მაჭავარიანმა.

როგორც ცნობილია, გერმანიაში საქართველოს ელჩი ალექსანდრე კარტოზია გერმანიის პრეზიდენტს რწმუნებათა სიგელებს დღეს გადასცემს. პარალელურად კი დაახლოებით წლინახევრის შემდეგ, გერმანიის საგარეო საქმეთა სამინისტროს ვებგვერდიდან წაიშალა ის არასწორი მონაცემები, სადაც საქართველოს მოქმედ პრეზიდენტად სალომე ზურაბიშვილი იყო მოხსენიებული.

ამ მოვლენებს წინ უსწრებდა პეტერ ფიშერის დიპლომატიური საქმიანობის დასრულება საქართველოში.