ლევან მახაშვილი ეუთოს საპარლამენტო ასამბლეის რეზოლუციასთან დაკავშირებით ოპოზიციის აჟიოტაჟზე: „მოღალატეები, აგენტები“ - ამ სიტყვებს ატრიალებდნენ. საზოგადოებამ განსაჯოს, ვის ეკუთვნის ეს იარლიყი - იმ ადამიანებს, რომლებიც ცდილობენ, რომ ქვეყანა ომის მოჯადოებული წრიდან გამოიყვანონ და ორგანიზაციებს თავისი სახე შეუნარჩუნდეს, თუ იმათ, ვისაც ამ მოჯადოებულ წრეში უნდათ ქვეყნის დატოვება

რაც უფრო მძიმედ აქვთ ქვეყნის შიგნით საქმე, მით უფრო გაცხოველებულია საგარეო მიმართულებით მათი ძალისხმევა და მცდელობები. დღესაც ამას ვხედავთ, რომ შიგნით არაფერი სათქმელი საკუთარ მოსახლეობასთან არ აქვთ და ასე ჯო უილსონის და ვიღაცების რეზოლუციებით ცდილობენ გარედან დაზაფრონ მოსახლეობა, რომ თითქოს რაღაც ხდება. სინამდვილეში, რაც მოხდა, მოხდა ის, რომ წერტილი დაესვა საერთაშორისო სამართალს, - განაცხადა გადაცემაში „იმედი LIVE“ ევროპასთან ინტეგრაციის კომიტეტის თავმჯდომარემ ლევან მახაშვილმა ოპოზიციაზე საუბრისას.

მისი თქმით, ეუთოს საპარლამენტო ასამბლეაზე მიღებულ რეზოლუციასთან დაკავშირებით ოპოზიციის აღტყინებულმა ყიჟინამ კარგად დაანახა საზოგადოებას, თუ ვინ არის მოღალატე.

„ძალიან ბევრი განცხადება გაკეთდა და მათ უამრავი სიტყვა გამოიყენეს. „მოღალატეები, აგენტები“ - ამ სიტყვებს ატრიალებდნენ. საზოგადოებამ განსაჯოს ვის ეკუთვნის ეს იარლიყი, მოღალატეებისა და აგენტების - იმ ადამიანებს, რომლებიც ცდილობენ, რომ ქვეყანა ომის მოჯადოებული წრიდან გამოიყვანონ და ორგანიზაციებს თავისი სახე შეუნარჩუნდეს, თუ იმათ, ვისაც ამ მოჯადოებულ წრეში უნდათ ქვეყნის დატოვება. ამის გაკეთებას გააგრძელებენ. ეს დააანონსეს კიდეც“, - განაცხადა ლევან მახაშვილმა.