პროკურატურამ გიორგი ბარამიძის განცხადებასთან დაკავშირებით გამოძიება სამშობლოს ღალატისა და საბოტაჟის ფაქტზე დაიწყო - რას აცხადებენ აფხაზეთის ომის ვეტერანები
აფხაზეთის ომის ვეტერანი გიორგი ბარამიძის იმ განცხადებაზე საუბრობს, რომლითაც "ნაციონალური მოძრაობის" წევრმა ქართველ მებრძოლებს სამხედრო ტყვეების დახოცვა დააბრალა. თემურ დარჯანია, რომელიც აფხაზეთში ოჯახის წევრთან ერთად იბრძოდა, ძმა სწორედ ომში დაეღუპა, ამბობს, რომ ბარამიძემ გავრცელებული ცრუ ინფორმაციით შეურაცხყოფა მთელ საქართველოს მიაყენა.
მმართველი გუნდის შეფასებით, სააკაშვილის მთავრობის თავდაცვის ყოფილმა მინისტრმა გარე ძალების დავალება შეასრულა და საერთაშორისო ორგანიზაციებში ქვეყნის პოზიციას საფრთხე შეუქმნა, გაამწვავა შერიგების შესაძლებლობა აფხაზეთთან, საქართველო კი ომის დამნაშავედ გამოიყვანა.
გიორგი ბარამიძემ ქართველი მებრძოლები აფხაზეთის ომში ტყვეების დახვრეტაში თავდაპირველად იაგო ხვიჩიას გადაცემაში დაადანაშაულა, შემდეგ კი იგივე ხალხს დააბრალა..მთელი ათი დღის განმავლობაში ბარამიძის განცხადებას სააკაშვილის პარტიის არც სხვა წევრები გაემიჯნენ დღეს კი უკვე თქვეს, რომ ამ თემაზე კომენტარს აღარ გააკეთებენ.
ბარამიძის ბრალდება ანტისახელმწიფოებრივი და ქვეყნის დამაზიანებელია სხვა ოპოზიციური პარტიებისთვის.
მტრული განცხადება საქართველოს ინტერესების წინააღმდეგ - ასეთია მმართველი გუნდის შეფასება გიორგი ბარამიძესთან დაკავშირებით. "ქართული ოცნება" გიორგი ბარამიძის განცხადების უკან სხვა ქვეყნის დავალებას ხედავს. სახელისუფლებო პარტიაში აცხადებენ, რომ "ნაციონალური მოძრაობა" მიზანმიმართულად ხელს უშლის ქართულ-აფხაზურ ურთიერთობებში ნდობის აღდგენის პროცესს.
პროკურატურამ გიორგი ბარამიძის განცხადებასთან დაკავშირებით გამოძიება სამშობლოს ღალატისა და საბოტაჟის ფაქტზე დაიწყო. საგამოძიებო უწყებამ უკვე გამოკითხა არაერთი ვეტერანი.
რუსთავი 2
წყარო: rustavi2.ge