ლევან მახაშვილი ევროსაბჭოში დებატებზე: ამ ყველაფრის უკან დგას ერთი და იგივე პოლიტიკური ოჯახი, რომლებიც ცდილობენ საქართველო ომის ფერხულში ჩართონ. ჩვენი მოლოდინია, რომ დებატებიც იქნება იგივე უსაფუძვლო ბრალდებები საქართველოს მიმართ

ევროსაბჭოში, საქართველოზე დებატებს, რომელიც დღეს გაიმართება, ლევან მახაშვილი „ქრონიკასთან“ აფასებს. ევროპასთან ინტეგრაციის საპარლამენტო კომიტეტის თავმჯდომარე აცხადებს, რომ მისი ვარაუდით, დებატებზე, ისევ საქართველოს მიმართ უსაფუძვლო დებატები იქნება.

„გადის პერიოდი, ბევრი რაღაც იცვლება, მაგრამ რაც არ იცვლება, ეს არის ვიწრო პოლიტიკური ინტერესი, რომ დააზიანონ საქართველოს ხელისუფლება და საქართველოს ხელისუფლება იყოს მათ დაკრულზე მოცეკვავე. სწორედ ამით არის ნაკარნახევი მთელი ეს რეზოლუციები და განცხადებები.

ამ ყველაფრის უკან დგას ერთი და იგივე პოლიტიკური ოჯახი, ერთი და იგივე ძალა, რომლებიც ცდილობენ საქართველო ომის ფერხულში ჩართონ. ჩვენი მოლოდინია, რომ დებატებიც იქნება იგივე უსაფუძვლო ბარალდებები საქართველოს მიმართ.

ჩვენ არაერთხელ დაგვიფიქსირებია, რომ მზად ვართ კონსტრუქციული, თანასწორუფლებიანი, ოღონდ მტკიცებულებებზე და სიმართლეზე დაფუძნებული დიალოგისთვის“, - აღნიშნა მახაშვილმა.

ევროსაბჭოში, საქართველოზე დებატები დღის მეორე ნახევარში დაიწყება. დღესვე მიიღებენ რეზოლუციას, რომელიც იმეორებს იმ ჩანაწერებს, რაც ბოლო პერიოდში ჩვენი ქვეყნის მიმართ მიიღება. ევროსაბჭოს წევრთა ნაწილი იმეორებს ქართული ოპოციიის ნარატივს, მეორე ნაწილი კი საქართველოს ევროპულ სტრუქტურაში დაბრუნებას ემხრობა.