ლევან მახაშვილი გერმანიის ელჩის განცხადებაზე: ეს, რა თქმა უნდა, არის ცალსახად ქსენოფობიური განცხადება. საკმაოდ მოწყვლადი რეგიონია და მათი თითოეული ასეთი განცხადება შესაძლოა გახდეს საწყისი ეტაპი ქვეყნებს, ერებს შორის ესკალაციის

გერმანიის ელჩის განცხადება, რომ მისი ინფორმაციით, ქართველ ხალხს არ სურს იყოს თურქი, რუსი, ირანელი ან აზერბაიჯანელი, „ქრონიკასთან“ საუბრისას საქართველოს პარლამენტის ევროპასთან ინტეგრაციის კომიტეტის თავმჯდომარე ლევან მახაშვილმა შეაფასა.

მახაშვილის თქმით, აღნიშნული განცხადება ცალსახად ქსენოფობიურია.

„ძალიან მნიშვნელოვანია ყველა დიდი პასუხისმგებლობით მოეკიდოს საკუთარ თითოეულ სიტყვას, განსაკუთრებით ამ რეგიონში. საკმაოდ მოწყვლადი რეგიონია და მათი თითოეული ასეთი განცხადება შესაძლოა გახდეს საწყისი ეტაპი ქვეყნებს, ერებს შორის ესკალაციის.

ჭირვეული ბავშვის საქციელი, რასაც ეს ადამიანი უკვე ამდენი წელია აკეთებს, ყოველგვარ ზღვარს გადადის. პიროვნულ საკითხებს გადააყოლა ქვეყნებს შორის ურთიერთობებიც, რაც ჩვენთვის მიუღებელია. ჩვენ დიდი მოლოდინით ველოდებით იმ მომენტს, როდესაც ის დატოვებს საქართველოს და ვიმედოვნებთ, გვექნება ახალი ელჩის პირობებში შესაძლებლობა, რომ ეს ძალიან მძიმე პერიოდი ჩავაბაროთ წარსულს“, - აღნიშნა ლევან მახაშვილმა.