ლევან მახაშვილი ოპოზიციაზე: ეს არის პირდაპირი საბოტაჟი სახელმწიფოს წინააღმდეგ, როდესაც ეს პოლიტიკური დაჯგუფებები ცდილობენ საქართველოს ინტერესების დაზიანებას
ეს არის პირდაპირი საბოტაჟი სახელმწიფოს წინააღმდეგ, როდესაც ეს პოლიტიკური დაჯგუფებები ცდილობენ საქართველოს ინტერესების დაზიანებას, - განაცხადა გადაცემაში „დღის ქრონიკა“ ევროპასთან ინტეგრაციის საპარლამენტო კომიტეტის თავმჯდომარემ ლევან მახაშვილმა ოპოზიციის ქმედებებზე საუბრისას.
მისივე თქმით, გადატვირთვის პროცესი არ არის გარანტირებული, რადგან შიგნითაც და გარეთაც გაცხოველებულები ებრძვიან ამ პროცესს.
„გაცხოველებულები ებრძვიან იმას, რომ რაიმე დადებითი, პოზიტიური დინამიკა არ გაჩნდეს ამ ურთიერთობებში, გაცხოველებულები ებრძვიან იმას, რომ არ იყოს არც შეხვედრები, არც საუბარი, არც დიალოგი, პირიქით მაქსიმალურად ხელს უშლიან ამ პროცესს. ცდილობენ დაკნინებას, გაუფასურებას და თითქოს არაფერი მომხდარა, თუმცა საზოგადოება კარგად ხედავს, რომ ძალიან ბევრი რაღაც ხდება, პროგრესირებს ეს ურთიერთობები ეტაპობრივად, კიდევ ბევრს მივაღწიეთ იმის ფონზე, რა წინააღმდეგობაც იყო ამ პოლიტიკური ჯგუფების მხრიდან.
არ უნდა უკვირდეთ ამ ადამიანებს, როდესაც მათ მიმართ არის საბოტაჟის საქმეები აღძრული და მათ ვუწოდებთ პოლიტიკურ რადიკალებს. რადგან იმის ნაცვლად, რომ ხელისუფლებას დაუდგნენ გვერდში, ქვეყანას დაუდგნენ გვერდში, რომ ეს გეოპოლიტიკური ქარტეხილები გავიაროთ მშვიდად და წყნარად, მაქსიმალურად ცდილობენ, რომ დააზიანონ ეს პროცესი.
ამას ვხედავთ აშშ-სთან დაკავშირებით, ევროკავშირთან დაკავშირებით, გერმანიასთან დაკავშირებით, თუმცა სახელმწიფო აკეთებს ყველაფერს იმისთვის, რომ ჩვენ ეს პროცესი მშვიდად, წყნარად გადავიაროთ და ამ პროცესში დაცული იყოს საქართველო ეროვნული ინტერესები“, - აღნიშნა ლევან მახაშვილმა.
ევროპასთან ინტეგრაციის საპარლამენტო კომიტეტის თავმჯდომარის თქმით, ამ პოლიტიკურ დაჯგუფებებს სათანადო შეფასება მისცა მოსახლეობამ და შემდეგ არჩევნებსა თუ სხვა პროცესებში მოსახლეობა სათანადო შეფასებას მისცემს საბოტაჟს და დესტრუქციულ ქმედებებს.
