ლევან მახაშვილი: რასაც ვაკვირდებით საერთაშორისო ორგანიზაციებთან დაკავშირებით, რომლებიც თავის დროზე შექმნილი იყვნენ საერთაშორისო სამართლის დაცვისთვის, დღეს არიან მდგომარეობაში, რაც მახსენებს ქართულ ფრაზას - უპატრონო სოფელს ეშმაკები დაეპატრონნენო

„რასაც ვაკვირდებით საერთაშორისო ორგანიზაციებთან დაკავშირებით, რომლებიც თავის დროზე შექმნილი იყვნენ საერთაშორისო სამართლის დაცვისთვის, დღეს არიან მდგომარეობაში, რაც მახსენებს ქართულ ფრაზას - უპატრონო სოფელს ეშმაკები დაეპატრონნენო“, - განუცხადა „ქრონიკას“ ევროპასთან ინტეგრაციის საპარლამენტო კომიტეტის თავმჯდომარე ლევან მახაშვილმა.

მახაშვილის თქმით, ზუსტად ეს სიტუაციაა, როდესაც ფუნქციადაკარგული ორგანიზაციები, დღეს აკეთებენ ყველაფერს გარდა იმისა, რაც არის მათი ფუნქცია.

„სამწუხაროდ, არაფორმალური გავლენების გავლენა ამ ორგანიზაციებში ღრმად იგრძნობა. თუ კი ვინმეს ან რამეს აზიანებს, ეს არ არის საქართველო, ეს არიან თავადვე ეს ორგანიზაციები, რომლებიც ასეთი რეზოლუციებით თავადვე საკუთარ თავს ანგრევენ შიგნიდან“, - აღნიშნა მან.

„ქრონიკამ“ ეუთოს საპარლამენტო ასამბლეას და ეუთოს სათავო ოფისს კითხვით მიმართა.

აპირებს თუ არა ეუთოს საპარლამენტო ასამბლეა რეზოლუციის იმ სადავო ჩანაწერებს გადახედოს, რომელზეც პრემიერ-მინისტრმა ბრიფინგზე გაამახვილა ყურადღება.

„ქრონიკა“ ასევე სვამს კითხვას, აპირებს თუ არა ეუთო, დაინტერესდეს საქართველოსთან მიმართებით საპარლამენტო ასამბლეის ქმედებებით.