ლევან მახაშვილი: საქართველოს ჰქონდა ფუნქცია, რომ ერთგვარად პროქსი სახელმწიფოდ ექციათ დასავლეთ-რუსეთის დაპირისპირებაში. აქედან გამომდინარე იყო გარკვეული პოლიტიკური ხმაური საქართველოსთან დაკავშირებით, რეზოლუციები, ორმაგი სტანდარტი, უსამართლო ცილისწამება. დღეს არა სრულად, მაგრამ გარკვეულწილად გადაიარა ამ პროცესმა და მათაც დაინახეს, რომ ეს იყო არასწორი პოლიტიკა

ევროპასთან ინტეგრაციის საპარლამენტო კომიტეტის თავმჯდომარემ ლევან მახაშვილმა გადაცემაში „დღის ქრონიკა“ არსებულ გეოპოლიტიკურ ვითარებაში საქართველოს ადგილსა და ფუნქციაზე ისაუბრა.

მან აღნიშნა, რომ პოლიტიკამ, რომლის ფარგლებშიც საქართველო ერთგვარ პროქსის სახელმწიფოდ განიხილებოდა, გარკვეულწილად გადაიარა.

„საქართველოს ჰქონდა ფუნქცია, რომ ერთგვარად პროქსი სახელმწიფოდ ექციათ დასავლეთ-რუსეთის დაპირისპირებაში. სწორედ აქედან გამომდინარე იყო გარკვეული პოლიტიკური ხმაური საქართველოსთან დაკავშირებით, მათ შორის რეზოლუციები, კრიტიკა, ორმაგი სტანდარტი, უსამართლო ცილისწამება და ბრალდებები. დღეს არა სრულად, მაგრამ გარკვეულწილად გადაიარა ამ პროცესმა და მათაც დაინახეს, რომ ეს იყო არასწორი პოლიტიკა. ამ პოლიტიკამ არ გაამართლა და არა თუ არ გაამართლა, მნიშვნელოვნად დააზიანა მათივე ინტერესები, ნდობა ამ სახელმწიფოებისადმი. დღეს ბევრი ხედავს, რომ შესაცვლელია ეს პროცესი.

ამიტომ დღეს შეიძლება, გერმანია იყოს, ხვალ - სხვა სახელმწიფო, ამას აუცილებლად ექნება ერთგვარი გადამდები ეფექტი, გადაიღვრება სხვა სახელმწიფოების პოლიტიკაზეც. ეს არის სწორი მიმართულება და ჩვენ მხოლოდ და მხოლოდ ხელს შევუწყობთ ამ პროცესს. ოღონდ საზოგადოებამ აუცილებლად უნდა იცოდეს ერთი რამ - ჩვენ თავქუდმოგლეჯილები არც ერთ პროცესში არ ვეშვებით, რა თქმა უნდა, ძალიან ფრთხილად, ჩვენი მოსახლეობის ინტერესების გათვალისწინებით, ნაბიჯ-ნაბიჯ, ეტაპობრივად ვიღებთ თითოეულ გადაწყვეტილებას. ჩვენი მთავარი ორიენტირი არის არა ის, რომ კიდევ რომელიმე ხალიჩა დაუფინონ ქვეყანას და ხელი ჩამოართვან, არამედ ქვეყნის ინტერესებიდან გამომდინარე, ფრთხილად ვიმოქმედოთ ამ გზაზე”, - განაცხადა ლევან მახაშვილმა.