მაია ბითაძე: დღეს, როდესაც მეგა სახელმწიფოები აძლიერებენ ურთიერთობებს ჩინეთთან, პატარა საქართველოსთვის ამგვარი ხელშეკრულების გაფორმება ნამდვილად ძალიან დიდი წინ გადადგმული ნაბიჯია, რაც ახალ შესაძლებლობებს ხსნის
ეს არის საუკუნის მიღწევა, იმის ფონზე, როდესაც მთელი მსოფლიო სულ უფრო და უფრო აქტიურად საუბრობს შუა დერეფანზე და საქართველოს როლზე ამ შუა დერეფნის ლოგისტიკური, სავაჭრო და პოლიტიკური კავშირების დამყარების ქვაკუთხედში, - ასე აფასებს გარემოს დაცვისა და ბუნებრივი რესურსების საპარლამენტო კომიტეტის თავმჯდომარე მაია ბითაძე ჩინეთსა და საქართველოს შორის ყოვლისმომცველი სტრატეგიული პარტნიორობის შეთანხმების გაფორმებას.
„დღის ქრონიკაში“ საუბრისას მან აღნიშნა, რომ ეს ნათელი მაგალითია იმისა, თუ რას აკეთებს საქართველო ამ მხრივ ქვეყნის როლის გასაძლიერებლად.
„სამომავლოდ ეს დოკუმენტი იქცევა იმის გარანტად, რომ საქართველოს რეალური გეოგრაფიული პოტენციალი ერთი მხრივ სწორად იყოს აღქმული ყველა სახელმწიფოს მხრიდან, მეორე მხრივ კი გაძლიერდეს ის რესურსი, რაც ქვეყანას აქვს. დღეს, როდესაც მთელი მსოფლიო, მეგა სახელმწიფოები ამყარებენ და აძლიერებენ ურთიერთობებს ჩინეთთან - ზესახელმწიფოსთან, რომელმაც პრაქტიკულად სასწაული მოახდინა ბოლო საუკუნის განმავლობაში და იქცა ეკონომიკურ და სავაჭრო გიგანტად და მეგა სახელმწიფოდ, პატარა საქართველოსთვის ამგვარი ხელშეკრულების გაფორმება ნამდვილად ძალიან დიდი წინ გადადგმული ნაბიჯია, რაც ახალ შესაძლებლობებს ხსნის ქვეყნისთვის“, - განაცხადა ბითაძემ.
მისივე თქმით, თბილისისა და პეკინის ურთიერთობა ნათელი მაგალითია იმისა, თუ როგორი უნდა იყოს სტრატეგიული პარტნიორობა 21-ე საუკუნეში და ამ პარტნიორობის სწრაფ განვითარებას გაუსვა ხაზი.
